CEO gerente general di Aeropuerto Ecologico di Galapagos na Ecuador, Jorge Sotillo: “Autoridadnan y comunidad di islanan den Reino Hulandes mester uni pa wak con nan por haci pa nan ta sostenibel”

Den conferencia “A Flight to the Future Convention” cu a wordo realisa ayera mainta pa Gobierno di Aruba tabata presente Jorge Rosillo ken ta fungi como CEO gerente general di Aeropuerto Ecologico di Galapagos y tambe gerente di Corporacion America na Ecuador e cual a splica cu e corporacion aki ta un hall internacional cu ta maneha 53 aeropuerto rond di mundo.

Rosillo a expresa cu e vuelo electrico di diadomingo ultimo na e evento “Sustainable Air Transportation” tabata “algo fantastico” unda tabata e prome biaha cu e tabata wak un avion bulando solamente a base di coriente y specialmente cu ta un avion certifica pa IASA na Europa “ta un experiencia gratificante”.

Ayera su persona como un di e ponentenen di e conferencia, el a splica na participantenan cu ta importante pa autoridadnan y comunidad di islanan den Reino Hulandes uni pa wak con nan por haci pa nan ta sostenibel, pa asina e negoshi lo ta rentabel pero si causa dañonan na medio ambiente y promoviendo e sociedad cu ta rond di dje.

“Ta hopi interesante pa wak cu autoridadnan principal di gobierno y di aeropuertonan ta akinan uni purbando di analisa y conversa tocante accionnan nobo cu nan por haci pa respeta e medio ambiente y pa colabora cu e sociedad”, Sotillo a resalta.

Mas importante pa Sotillo ta cu tin cu comprende cu sostenibilidad ta inclui tres pilar: prome ta e medio ambiente cu mester cuid’e, di dos tin cuida e sociedad e cual ta wordo influencia y di tres pa haci di e negoshi algo rentabel “uni e tres pilar aki ta un desafio pero ta algo cu por wordo haci, mi a papia con nos a haci’e na aeropuerto di Galapagos”, el a bisa.

Sotillo a conta cu na aña 2011 nan a gana e concesion pa operacionnan di aeropuerto di Galapagos por ta priva y Gobierno di Ecuador a pidi na nan cu como Galapagos ta un icono na nivel mundial di conservacion di naturalesa, pa e aeropuerto ta un aeropuerto berde.

“Nos a dicidi cu no solamente ta bay ta un aeropuerto berde sino cu ta bay ta e prome aeropuerto ecologico na mundo, nos a cuminsa cu e diseño y construccion pa tur cos ta den pro di ambiente, despues cu nos a haci’e y cu nos a haya un certificado di Merca di Green Building Council y nos a haya e certificado di leed di oro cu ta e certificado maximo cu nan por duna unda ya caba nos tabatin un edificio berde, nos a wak con nos a opera di un manera ecologico e aeropuerto aplicando diferente medidanan y na caminda nos a ripara cu no solamente ta medio ambiente sino, tambe ta e sociedad cu nos ta influencia unda ecologia a cuminsa cambia pa sostenibilidad di negoshinan”, Sotillo a expresa.

Igualmente el a bisa cu nan a implementa medidanan social y ambiental pa mantene nan negoshi rentabel, cu si ta posibel segun el a sigura, pero mester canalisa cada un di e situacionnan na e pais unda nan ta, ubicacion geografico den cual e pais ta y wak kico tin mester e medio ambiente of con por colabora di algun forma pa no afecta hopi medio ambiente. Di otro banda, con nan por forma parti di e desaroyo economico den e sociedad unda ta opera.

Inversion pa infrastructura di un aeropuerto sostenibel manera Sotillo a menciona, ta depende di na unda e pais ta ubica unda el a pone por ehemplo na Galapagos, cu prome cu nan ta bay haya avionnan electrico nan mester pone panel solar pa provee coriente na e avion electrico “pasobra si no bo ta bay kima combustibel y no ta bay sirbi di nada kima combustibel pa un avion electrico bay bula, kiermen mester ta coherente y nos tin e desafio di aumenta e capacidad di nos panel solar instala eynan”, el a finalisa.