(AP) — Despues di haci un promesa riba Twitter, CEO di Tesla, Elon Musk a bende alrededor di 4.5 miyon accion di stock di e fabricante di auto electrico, generando alrededor di $5 biyon dollar.
E benta, revela den 10 documento regulatorio diaranson, ta conta pa alrededor di 3 porciento di e participacion di Musk den e compania.
Alrededor di $1.1 biyon ta bay pa paga obligacion di impuesto pa opcionnan di accion otorga na Musk na september.
Weekend siman pasa, Musk a bisa cu e lo bende 10 porciento di su participacion den e compania, na balor di mas di $20 biyon, basa riba resultado di un encuesta cu el a haci riba Twitter. Tweetnan di e benta a causa benta di e participacion riba dialuna y diamars, pero a recupera un tiki riba diaranson. Accionnan a aumenta 2.6 porciento na $1,096 den intercambio extendi diaranson, y a aumenta mas di 50 porciento e aña aki.
E documentonan tambe a revela cu Musk a eherce opcionnan pa cumpra tiki mas cu 2.1 miyon accion pa $6.24 cada un. Stock di e compania a cera diaranson na $1,067.95 pa accion.
E transaccionnan di impuesto tabata ‘ehecuta automaticamente’ como parti di un plan comercial adopta dia 14 di september pa bende opcionnan cu ta caduca proximo aña, segun documentonan entrega cu US Securities and Exchange Commission. Esey tabata casi dos luna prome cu el a presenta e idea di benta riba Twitter.
Despues di e transaccionnan, Musk ainda ta doño di alrededor di 167 miyon accion di Tesla.
Musk a bisa cu el a propone bende e stock ya cu algun Democrata ta pushando pa biyonarionan paga impuesto na momento cu e prijs di e stock cu nan ta posee ta aumenta, hasta si nan no bende ningun accion. Sinembargo, e asina-yama ‘billionaires tax’ a keda elimina di presupuesto di presidente Mericano, Joe Biden, cual ainda ta siendo negocia.
“Ta papia hopi recientemente di ‘unrealized gains’ como un forma pa evadi impuesto, pues mi ta propone bende 10% di mi stock di Tesla”, Musk a tweet diasabra siman pasa. “Bo ta sostene esaki?”
Tesla no ta paga Musk salario cash, pero a ricibi opcionnan enorme di stock. “Mi tin solamente stock, pues unico forma pa mi paga impuesto personalmente ta bende accion”, Musk a tweet.
