Yen di entusiasmo, CEO di Tiara Air sr. AlejandroMuyale a regresa Aruba despues cu e compania local aki a realisa su prome vuelo pa Corsou. E vuelo aki a tuma lugadespues di un receso largo di casi dos aña, aña y mey cu e compania aki no tabata opera su avionnan. “Nos tin un experiencia grandi nos tras, pero nos a sali bek vencedor di dje”, el a bisa.
El a reconoce cu e compania a pasa den un “tempestad” fei di luna di october 2013. Pero danki na e trabou duro y cu perseverancia di un team dedica nan por a logra di cumpli cu tur e exigencianan aeronautico pa certifica y asina re inicia nan operacion aereo.
Cumplimento y situacion financiero
El a declara na Bon Dia Aruba cu Tiara Air a bin bek despues di dos aña y mey. “Nos intencion ta bon. Nos ta dicidi y e clientenan cu a pasa den iregularidad di vuelo den pasado, ami un biaha mas ta pidi mi disculpa na nan. Pero duna nos un chens y bin purba nos vuelonan cu nos ta bay tin. Vuelonan cu nos ta publica nos ta bay cumpli cu nan shen porshento esey ta nos meta”, segun CEO di Tiara Air.
Sr. Muyale a declara cu un factor cu den pasado a afecta nan cumplimento di nan orario di vuelo tabata e problema cu a surgi na Venezuela cu e fluho di fondo pa asina Tiara Air por a cumpli cu nan clientenan. “Esey a trece un desbalansa completo den henter organisacion y operacion, etc…”, el a declara. Nan ta consciente di esey. P’esey nan a re inicia nan operacion cu un itinerario limita cu un vuelo so mainta pa cumpli na ora.
Encuanto e situacion financiero dificil cu e compania aki a pasa den dje, el a bisa cu Tiara tin un acuerdo via Corte cu nan a logra luna di november 2015. Danki na e acuerdo aki Tiara Air a sinti un alivio pasobra e decision aki a kita un “peso grandi fei di e compania pa cu cosnan cu tin atrasa”, el a bisa.
Tambe el a laga sa cu Tiara Air tin un entrada atrasa fei di Venezuela. Encuanto e placa ey, sr. Muyale no ta perde speransa cu lo por resolve algo. Pero den nan plan di negoshi actual nan no kier tene cuenta cu e placa ey mirando cu nan a re inicia nan operacion.
Vuelo di reapertura
El a bisa cu nan a ricibi un caluroso bon bini y un tremendo recepcion na Corsou. “Nos a sinti un bon bini grandi. Esey a pone nos sinti hopi bon”, el a bisa.
Sr. Muyale a informa cu Tiara Air a cera un aliansa strategico cu Avior Airline cu lo permiti pa e dos compania aki por ofrece un red di vuelo hopi amplio pa asina ofrece mas destino y complementa nan mes operacional y comercialmente.
E compania aereo Avior ta bula e ciudadnan di Miami, Panama, Barcelona, Bogota, Corsou, Guayaquil, Manaos, Manta, Medelliny varios destinacion Venezolano manera Valera, Maracaibo, Caracas, Valencia, Puerto Ordaz, etc… E ta haya cu e aliansa aki e clientenan lo haya un miho producto y nan lo contribui cu e turismo di nos isla. Ya den pasado (2012-2013) nan a contribui cu un 5% di e turismo pa Aruba y nan meta cu e aliansa aki ta di surpasa e cifra aki
El a recorda cu dia 12 di april 2006, Tiara Air a realisa su prome vuelo comercial saliendo na e mesun ora di ayera, e mesun destino cu tabata Corsou.
El a anuncia cu nan a cuminsa un itinerario di vuelo diario y tempran pa Corsou cu excepcion di diamars. E ta un vuelo mainta saliendo 7:15 am. Inicialmente e ta un vuelo mainta. E ta kere cu aki dos siman nan lo cuminsa ofrece vuelo den ora di atardi riba diabierna y diadomingo.
Ya caba el a anuncia cu na inicio di mei na lo cuminsa cu cuater vuelo pa Punto Fijo pa un total di 12 vuelo pa siman,caminda nan prijs di ticket lo ta na florin.
Inicialmente nan a re inicia nan operacion basta limita pero ideanan tras di dje ta pa nan lo por cumpli cu un vuelo sigur, na ora y comodo. El a lamenta cu ayera den nan vuelo di re inauguracion nan no por a yega na tempo, pero e tabata un “retraso planifica”, ya cu na Corsou tabata hopi evento plania den cuadro di e acontecimento aki. Pero el a laga sa cu nan clientenan por conta cu nan vuelonan lo ta na ora y comodo. “Esey ta nos meta primordial”, el a bisa.
Tipo di avion
Nan a cuminsa cu e tipo di avion Short 360 cu capacidad pa 36 pasahero cu a pasa den un “servicio completo 100%. E ta den top condicion”, segun CEO di Tiara.
Sr. Muyale a anuncia cu na juni nan lo bini cu un cambio di flota cu cuater avion Fokker 50 cu capacidad pa 50 stoel pa sirbi e mercado regional. Esaki lo permiti pa Tiara Aircuminsa subi nan frecuencianan. Tambe nan lo introduci avion Boeing 737-400 pa atende cu tur e ruta inclusivo Colombia cu nan tabata opera prome cu nan a bay den receso.
Na final sr. Muyale a gradici den nomber di Tiara Air tur esunnan cu a contribui cu e reapertura aki. Tambe el a formula un invitacion pa tur hende join Tiara Air bek ya cu nan a bin cu un prijs di ticket hopi competitivo.
