(AP) – CEO di Ford Motor Co. a insisti riba un resolucion di e investigacion riba principal di team Red Bull, Christian Horner den un carta manda na e team, di cual Associated Press a obtene un copia ayera.
E carta fecha diabierna di CEO di Ford, Jim Farley a expresa su disgusto cu “e acusacionnan sin resolve di comportamento inapropia di liderazgo di Red Bull Racing.”
Farley a nota cu ta 11 dia desde cu Ford, cu ta programa pa bira e proveedor di motor di Red Bull na 2026, prome a solicita mas informacion riba e investigacion cu compania mama di Red Bull a anuncia dia 5 di februari riba acusacionnan contra Horner haci pa un empleado di e team. Red Bull no a duna ningun detaye publico riba e acusacion, cu inicialmente a keda caracterisa internamente como un investigacion riba e “estilo agresivo di maneho” di Horner, pero awo a cambia den reportahe di mal conducta sexual.
Horner a rechasa tur acusacion y a bisa cu e tambe kier un resolucion rapido di e investigacion.
“Manera nos a indica anteriormente, sin respuesta satisfactorio, e balornan di Ford no ta negociable,” Farley a skirbi den e carta. “Ta imperativo pa nos partnernan di careda comparti y demostra nan compromiso genuino pa e mesun balornan. Ami y mi team ta disponible na cualkier momento pa discuti e asunto aki. Nos ta keda insisti, y cu speransa, pa un resolucion cu nos tur por para tras di dje.”
Te awo, Ford ta e unico partner corporativo di Red Bull cu a papia publicamente riba investigacion riba Horner. E compania segun reportahenan a manda un carta inicial na Red Bull – aparentemente loke Farley a referencia den comunicacion diabierna – pero AP no a mira e prome carta.
Ayera, Ford a nenga di duna comentario.
Formula Uno y e cuerpo gobernante FIA ambos a duna un declaracion presionando Red Bull pa un resolucion. Pero ni Larry Ellison, co-fundador di Oracle, sponsor titular di Red Bull; ni Ryan McInerney, CEO di Visa, a contesta solicitud di AP pa comentario. Na Januari, Visa a keda anuncia como sponsor titular di team junior di Red Bull, den e prome partnership di sport mundial pa Visa den 15 aña.
Carta di Farley a expresa frustracion cla cu e velocidad di e investigacion. Den e tempo desde cu e compania mama di Red Bull, basa na Austria, a revela cu tabata investigando acusacion di mal conducta, Horner a continua den su rol como lider di e team di e actual triple campeonnan mundial.
Horner tabata na e lansamento di e auto di 2024 dos siman atras, a pasa ultimo siman cu e team haciendo test na Bahrain, y a bisa cu e ta spera di ta principal di e team ora e temporada nobo di F1 tin su apertura proximo weekend.
Farley a skirbi cu maske Ford ta confia cu e investigacion ta husto, e compania ta “cada bes mas frustra, sinembargo, pa e falta di resolucion of indicacion cla di boso tocante ki momento ta anticipa un resolucion husto di e asunto aki. Nos ta igualmente frustra pa e falta di transparencia completo tocante e asunto aki cu nos, bo partnernan corporativo, y ta anticipa pa ricibi un relato completo di tur hallazgo.”
Farley a caba e carta exigiendo “atencion rapido y serio” riba e asunto.
E investigacion riba Horner a consumi comunidad di F1 mientras comienso di e temporada nobo y e campaña di Max Verstappen pa un di cuatro titulo consecutivo ta apenas algun dia leu. Tabatin casi 100 pida di evidencia introduci durante un interogacion di Horner, kende supuestamente a ofrece su acusador un resolucion di seis cifra. Sinembargo, su destino ta complica sin importa kico haya den e investigacion.
Red Bull tabata funda pa Dietrich Mateschitz y Chaleo Yoovidhya, un boticario Thai. Mateschitz a fayece aña pasa y maske su yiu homber Mark ta dirigi e compania, e famia tin apenas 49% di propiedad di Red Bull. E otro 51% ta propiedad di Yoovidhya, y e futuro di Horner cu Red Bull por keda den un enfrentamento entre e dos famia.
