CEOnan di Amazon, Facebook, Apple y Google diamars anochi a duna comentarionan di apertura y a pone nan compania como icono di ingenio Mericano prome cu un audiencia anti-competencia altamente anticipa cu legisladonan.

Jeff Bezos (Amazon), Mark Zuckerberg (Facebook), Tim Cook (Apple) y Sunda Pichai (Google) lo presenta dilanti subcomite anti-competencia di Congreso. Miembronan di e subcomite pa mas cu un aña ta investigando si e cuatro gigantenan ta sofoca competencia y ta daña consumidornan. Den e tempo ey, e subcomite a compila mas di 1.3 miyon documento di e companianan, competidornan y agencianan di cumplimento di competencia.

Amazon
 Jeff Bezos a cuminsa su declaracion cu un storia personal tocante su infancia cu su mama, kende tabata un studiante di scol secundario di 17 aña di edad na momento cu a duna luz, y su tata adoptivo, un inmigrante Cubano. El a conta e inicio di Amazon, claramente posicionando storia di origen di su compania como epitome di e soño Mericano.

Sinembargo, mientras cu pa hopi hende e soño ey ta un cas y trabou stabiel, Bezos a crece su compania na e minorista mas grandi di mundo. Awo e ta e persona mas rico di mundo, na balor di alrededor di $180 biyon.

Igual na otro gigantenan tecnologico defendiendo su mes contra acusacion di monopolio, Bezos a papia di creacion di trabou, su inversionnan na Merca y competencia.
Tocante creacion di trabou, el a destaca cu Amazon ta emplea 1 miyon persona. Hopi di su trabou no por ‘outsource’ pafo di Merca pasobra nan ta necesario den comunidadnan local pa paketa y manda producto na clientenan.

Pa cu inversion na Merca, el a bisa cu esaki ta mas di $270 biyon durante ultimo decada. Y pa cu competencia, el a bisa cu su compania ta apenas un hungado chikito den retail global, contando pa apenas menos di 1% di industria minorista mundial y menos di 4% di mercado Mericano. Sinembargo, esaki ta bagatelisa e hecho cu Amazon ta e hungado dominante den benta online ta Merca, cu 38% di e mercado.

Identificando su competencia – Walmart, Target y Alibaba – Bezos a ofrece un defensa di companianan grandi, bisando cu unicamente nan por maneha e asuntonan compleho di negoshi. “Mi no ta worry con bon un entrepreneur bo ta. Bo no ta bay construi un all-fiber Boeing 787 den bo garage.”

Facebook
 Mark Zuckerberg a bisa legisladonan cu e red social ta ‘orguyosamente un compania Mericano’ cu tin competencia, incluyendo companianan Chines. Zuckerberg a bisa den su declaracion cu e compania ta enfrenta ‘competencia global intenso’, incluyendo TikTok, propiedad di ByteDance di China, y appnan Mericano manera Twitter y Snapchat.

El a bisa cu Facebook ta competi cu Apple, Amazon y Alphabet, cual ta doño di Google y YouTube. El a bisa cu nan tin balornan – democracia, competencia, inclusion y expresion liber – y cu no por garantisa cu esakinan lo ta vencedor. “Por ehempel, China ta construyendo su propio version di internet enfoca riba ideanan diferente, y ta exportando nan vision na otro paisnan.”

El a bisa cu e ta sostene politica di ‘competencia fuerte y consistente’ cu ta sigura un campo igual. Facebook tambe a crea productonan nobo den respuesta na competencia, ta contribui na e comunidad ‘open-source’ y ta crea hermentnan nobo pa yuda organisacionnan sin fin di lucro. Hende ta check si nan sernan keri ta safe durante un desaster natural, y ta adresa pandemia di coronavirus.

Zuckerberg a bisa legisladonan cu su adkisicionnan a yuda duna impulso na innovacion, no a reduci esaki. Instagram, WhatsApp y Facebook tur ta traha hunto pa combati spam y contenido dañino cu ta viola e reglanan di e red social.

Na luga di separa e compania, Zuckerberg ta pushando pa mas regulacion tocante asuntonan manera privacidad y portabilidad di data. “Mi ta compronde cu hende tin preocupacion tocante e tamaño y poder precibi cu companianan tecnologico tin. Na final, mi ta kere cu companianan no mester ta haciendo asina hopi decision riba asuntonan importante manera contenido dañino, privacidad y integridad di eleccion riba nan mes”, el a declara.

Tambe e ta kere cu eventualmente un otro red social lo reemplasa Facebook, notando cu e compania a tene e borchi di locual tabata e sede Sun Microsystems riba su campus, pa recorda nan cu e industria tecnologico ta cambia rapidamente.

Apple
 Tim Cook a resalta con e iPhone App Store, lansa na 2008, a crea un industria riba su mes cu a yuda duna impulso na companianan global. “Companianan di Fortune 500 a cuminsa riba iPhone.”

Cook ta bisa cu iPhone y e smartphone competidor, Samsung, LG y otronan a altera e industria tecnologico, pero ta argumenta cu Apple no tin un parti dominante di e mercado den ningun di e industrianan den cual ta competi.

Den parti, su testimonio di apertura ta defende Apple contra un argumento di oficialnan di Comision Europeo investigando e compania. Na UE, Apple ta acusa di ta un ‘gatekeeper’, efectivamente scogiendo ganado y perdedo, sofocando innovacion y afectando prijs competitivo den e proceso.

Ademas e lo argumenta cu e comision di hasta 30% cu Apple ta cobra ta yuda paga pa mehoracion, herment di programacion y otro codigo cu ta yuda pa appnan traha.

Mientras Cook ta bisa cu e ta invita scrutinio, tambe e lo argumenta cu plataforma di Apple ta crea 1.9 miyon cupo di trabou Mericano den tur 50 estado. “Esaki ta nada otro cu un milager economico den un tempo relativamente cortico.”

Google
 Igual na Bezos, Pichai ta cuminsa su testimonio cu un nota personal, recordando su infancia na India cu tiki acceso pa computer. Despues cu el a yega Merca pa postgrado na Universidad di Stanford, e ta bisa cu e tabata impresiona pa tur e computer den laboratorionan di e scol.

Pichai ta referi na cantidad di negoshi chikito na e pais cu ta usa servicionan di Google pa opera.

E ta argumenta cu Google tin hopi competido, mencionando varios cu su nomber. E ta destaca cu Amazon tin su assistent di voz, Alexa ora ta trata di buskeda di voz, cual den añanan recien a bira un di e rivalidadnan mas fiero di industria tecnologico.

E ta nombra un cantidad di compania como competidor den aviso digital, incluyendo Twitter, Instagram, Pinterest y Comcast. Sinembargo, e no ta nombra e scala masivo di Google, un plataforma di aviso cu tin alcance a traves di internet y ta genera mayoria di e $160 biyon anual den benta pa e compania.

Ademas e ta bisa cu Android, sistema operacional mobil di e compania, ta duna consumidonan mas escogencia pa smartphone. Criticonan ta bisa cu Google ta usa e software, cu ta podera casi 9 di cada 10 celular na mundo, pa forsa partnernan ‘bundle’ app di Google, manera Search y Maps den nan oferta. Pichai ta argumenta cu esey ta yuda tene e prijs di e aparatonan abou.