Maske e recuperacion di industria di crucero lo ta uno hopi slow y gradual, CEO di Aruba Tourism Authority, Ronella Croes a bolbe duna indicacion cu proximo luna lo tin e prome cruceronan ta yega back Aruba. Esaki despues cu tur crucero cu tabatin Aruba riba su ruta a ricibi permiso pa nabega.

A pesar di e noticia positivo di reanudacion di yegada di crucero na Aruba, Croes tabata cauteloso, advertiendo: “E recuperacion lo cuminsa basta poco poco y lo dura largo. Pa awo, e cruceronan por tin maximo mita di ocupacion. Na e hafnan tin protocolnan estricto obligatorio pa preveni cu e virus por wordo treci abordo. Riba esaki nos ta trahando awo.” Croes a enfatisa cu e recuperacion di turismo crucero lo ta hopi mas lento cu e otro aspectonan di turismo, por ehempel, turismo via avion.

Cosnan manera nan tabata antes, e normal bieu, no lo bolbe prome cu 2022. Sinembargo, Aruba actualmente ta keda haci tur preparacion pa ricibi e prome cruceronan back cumpliendo cu tur protocol relaciona cu pandemia. Esaki teniendo cuenta, entre otro, cu reglanan di CDC na Merca, for di unda segun Croes ‘practicamente tur crucero cu kier bin Aruba ta sali’. CDC recientemente a duna aprobacion pa tur crucero cu kier bin Aruba por haci esaki, segun Croes.

Ademas el a adverti comerciantenan local cu por ta wardando cu speransa pa e pasaheronan di crucero bin gasta placa, pa ta cauteloso. “Nos mester keda tene nos mes na e reglanan di coronavirus. Seguridad ta prioridad. Pa e motibo aki ta hopi importante pa e gran mayoria di e poblacion ricibi vacuna contra coronavirus.”

Banda di e trayecto di combati e virus, cu a wordo sigui na e momentonan aki pa algun simannan caba, ta e trayecto di recuperacion economico y esun cu ta hayando mas atencion, conforme na e maneho nacional di crisis cu ta consisti di diferente cluster. Nan como cluster 8 esun mas comercial y turistico a bin reuni semanalmente cu tur miembro di e cluster y tambe conhuntamente cu Bureau Rampenbestrijding Aruba, igualmente cu DVG y KPA.

E miembronan di e cluster aki ta entre otro ATIA, Aruba Timeshare Asociation, Aruba Food & Beverages Asociation, AHATA y Comerciantenan Uni cu ta reuni cada siman, Croes a bisa cu hopi di e flexibilisacion cu a mira recientemente di diferente medidanan incluyendo orario di clausura, cantidad di personanan na mesa, entre otro, a bin tambe di e movecion aki y e trayecto di recuperacion economico.