CEO di Apple, Tim Cook a lansa un serie di atake tiki disimula contra Facebook y otro companianan di rednan social ayera, escalando un bataya tocante privacidad online cu e fabricante di iPhone ta enfrentando contra servicionan digital cu ta depende riba tracking di hende pa bende aviso.
“Demasiado persona ainda ta puntrando ‘con hopi nan por?’ na momento cu nos mester ta puntrando ‘kico ta e consecuencianan?’”, Cook a bisa. “Kico ta e consecuencianan di no solamente tolera sino recompensa contenido cu ta socava confiansa publico den vacuna cu ta salba bida? Kico ta e consecuencia di mira miles di usuario ta join gruponan extremista y despues perpetua un aligoritmo cu ta recomenda mas?”
Papiando na e Conferencia Internacional riba Computer, Privacidad y Proteccion di Data, teni virtualmente, Cook a bisa cu ‘ta ora pa stop di pretende cu e maneho aki no ta bin cu un costo – di polarisacion, confiansa perdi, y si, di violencia’.
Cook nunca a nombra Facebook specificamente ni otro compania. Pero su comentarionan a laga tiki duda cu su misilnan tabata enfoca riba e sitionan di rednan social cu a ricibi critica pa permiti teorianan di conspiracion, discurso di odio y desinformacion politico cu a culmina den e insureccion dia 6 di januari cu a tuma over e US Capitol mientras Congreso tabata purba di confirma eleccion di presidente Joe Biden.
“No por permiti un dilema social converti den un catastrofe social”, Cook a agrega, referiendo na un documental di Netflix tocante efectonan corosivo di tecnologia – y specialmente rednan social – riba sociedad. E pelicula ey a enfoca riba Facebook y con su aligoritmonan ta manipula su casi 3 biyon usuario pa pone nan mira e avisonan cu ta genera mayoria di su ganashi.
E comentarionan di Cook a yega mientras Apple ta prepara pa lansa un control di privacidad nobo na cuminsamento di spring pa preveni appnan di iPhone secretamente ta track hende. Esey ta pone e caracteristica na caminda pa yega despues di un retraso di mas di seis luna, cu meta di alivia Facebook y otro servicionan digital cu ta depende riba data di vigilancia en cuestion pa yuda bende aviso.
Maske Apple no a duna un fecha specifico, e cronograma general revela ayera ta nifica cu e salvaguardia hopi anticipa, conoci como App Tracking Transparency, lo ta parti di un update di software iPhone cu probablemente lo yega na fin di maart of na april.
Despues di retrasa e introduccion di e salvaguardia – planea pa september – memey di indignacion lidera pa Facebook, Apple anteriormente a bisa cu lo lansa esaki e aña aki. Apple a lansa e update programa mas recien comp parti di Data Privacy Day.
Apple a warda pa duna Facebook y otro fabricantenan di app mas tempo pa ahusta na un caracteristica cu lo rekeri usuarionan di iPhone duna nan permiso explicito pa wordo tracked (registra su actividad online). Analistanant a spera un cantidad significante di usuarionan lo rechasa e permiso ey, unabes cu esaki ta rekeri. Actualmente, appnan ta track usuarionan di iPhone cu ta instala esakinan a menos cu nan tuma e stap adicional di bay den settings di iPhone pa preveni esaki.
“Tecnologia no mester cantidadnan enorme di data personal, mara hunto a traves di decenas di app y website, pa ta exitoso”, Cook a bisa. “Aviso tabata existi y a prospera pa varios decada sin esaki.”
Como un suplemento na comentarionan di Cook, Apple tambe a lansa un reporte di 11 pagina pa ilustra con hopi apps por siña tocante nan usuarionan den bida diario.
Facebook a aumenta su atakenan contra e control di privacidad nobo di Apple luna pasa den un serie di avisonan full-page den New York Times, Wall Street Journal y otro corantnan Mericano. E campaña aki tabata sugeri cu algun servicio digital gratis lo ser afecta si nan no por compila informacion personal pa personalisa aviso. Diaranson, CEO Mark Zuckerberg a cuestiona e motibo di Apple pa e cambionan, bisando cu Apple ‘tin tur incentivo’ pa usa su propio plataforma mobil pa interferi cu rivalnan na su propio app di mensahe. “Apple por bisa cu nan ta haciendo esaki pa yuda hende, pero e movidanan claramente ta track nan interesnan competitivo”, Zuckerberg a bisa.
Google, cu tambe ta depende riba data personal pa podera e red mas grandi di aviso riba internet, no a join Facebook den su critica di e controlnan di Apple. Google ta genera ganashi door di ta e motor di buskeda default riba e iPhone, un posicion clave pa cual ta paga Apple alrededor di 12 biyon anualmente.
Pero Google diaranson a adverti den un blog post cu e controlnan nobo di Apple lo tin un impacto significante riba ganashi di aviso di iPhone pa otro appnan den su red digital. Google a bisa cu un ‘manyen’ di su propio appnan di iPhone lo ser afecta pa e rekisito nobo, pero tin plan pa haci cambio pa esakinan no wordo afecta asina hopi. No a identifica na ki appnan tabata referi. “Nos ta keda comprometi na preserva un ecosistema di app vibrante y habri unda hende por haya acceso na un variedad amplio di contenido sosteni pa aviso cu confiansa cu nan privacidad y escogencianan ta respeta”, segun Christophe Combette, group product manager pa Google Ads.
