Despues di 11 luna di negociacion, gerencia di Air Navigation Services Aruba (ANSA) a firma un contracto colectivo (CAO) pa 3 aña cu sindicato STA.

Den e CAO nobo aki, un grupo di 38 trahado a haya beneficio den tur cos. No solamente riba un aumento substancial di 500 florin pa luna cu forsa retroactivo for di 1 di januari ultimo, pero tambe beneficionan secundario. Pero ya caba, tanto CEO di ANSA, Nilknarf Kock; como presidente di STA, Diego de Cuba, a adverti e trahadonan pa no warda speransa cu aki tres aña lo conta cu un CAO asina bon. “Den todo caso, mi no ta kere cu esaki a largo plaso ta sostenibel,” segun Kock.

Te hasta –segun Kock– nan a haci un advertencia na e sindicato, cu si e situacion aki no mehora a corto plaso, e no ta descarta cu lo haci un peticion na STA pa sinta na mesa pa re negosha e CAO aki.

Kock a laga sa cu e negociacion di e CEO a bay asina largo, ya cu nan mester evalua e espacio financiero di e compania aki. E ta haya cu e no tabata un negociacion dificil, pero si nan a confronta contratiempo. E pakete di beneficio aki den tres aña lo costa e compania 800 mil florin.

Impacto ciere di frontera
El a admiti cu e situacion cu Venezuela tabatin un impacto pisa pa nan entradanan. P’esey prome cu Kock a pone su firma riba e CAO nobo aki, el a duna un panorama financiero di e compania cu el a cualifica como un ‘mensahe di cautela.’ Kock su intencion tabata pa e mensahe aki por yega na e trahadonan via nan sindicato

El a bisa cu e compania aki ta liga cu mundo di aviacion, cu tin su retonan. E situacion di e ciere di frontera cu Venezuela for di februari ultimo a afecta ANSA seriamente. Nan a bay atras cu 10% di nan entrada y ainda no por a logra lanta cabes. A pesar cu nan ta purba di compensa e caida aki cu e vuelonan cu ta biniendo for di Merca, pero te ainda nan no por mira e señal ey. Kock a laga sa cu gobierno ta na haltura di e desaroyo aki, ya cu sigur ANSA no ta e unico compania liga na sector di aviacion cu ta sinti e efecto aki.

ANSA ta un compania relativamente jong, encarga cu e parti di siguridad den e trafico aereo. Nan a haya independencia 5 aña pasa for di Departamento di Aeronautica Civil. ANSA tin un cuerpo di personal di 45 trahado, di cual 38 di nan lo cay den e areglo di e CAO nobo aki. Pero tambe nan a yega di haci inversion substancial pa trece siguridad den nabegacion aereo y eficiencia den nan servicio.

No solo nan trahadonan, pero nan clientenan ta hopi satisfecho cu e parti di siguridad y eficiencia. Den e ley pa independisacion di ANSA, e meta principal tabata pa elimina e retraso cu tabatin den trafico aereo, pa medio di inversionnan den ekipo sofistica di nabegacion aereo.

“Nos compania basicamente a wordo lanta pa haci inversion”, el a expresa. Esey ta nan modelo di negoshi y tur loke nan por genera ta bay pa reserva pa realisa inversion.