Airbnb Inc. ta bisa cu ta prohibiendo pa huur cas unicamente pa fiesta, esta ‘party houses’, despues di un tiramento mortal na un cas di huur di Airbnb na California.
Den un serie di tweet diasabra, co- fundado y CEO di Airbnb, Brian Chesky a bisa cu e compania basa na San Francisco ta aumentando esfuersonan pa ‘combati fiestanan no autorisa y elimina conducta abusivo di anfitrionnan y invitadonan’. “Nos mester haci miho, y nos lo haci miho. Esaki ta inaceptabel”, Chesky a bisa.
Airbnb semper a prohibi fiestanan sin autorisacion, pero tin plan pa aumenta cumplimento di e politica aki. Chesky a bisa cu Airbnb lo expande screening manual di reservacionnan di ‘riesgo halto’ cu ta señala pa su sistema. Reservacionnan pa un anochi na un cas grandi, por ehempel, lo por haya extra scrutinio.
E compania tambe tin plan di ta menos tolerante cu anfitrionnan kende ta permiti nan cas bira un molester a largo plaso den nan bario. Efectivo inmediatamente, e compania lo retira bishitantenan y anfitrionnan kende no cumpli, Chesky a bisa.
Chesky ta bisa cu Airbnb tambe ta formando un team di rapid response dedica pa fiestanan na cas. E no a bisa kico e team lo haci, cu polis no ta haci caba.
Margaret Richardson, vice presidente di confiansa di Airbnb, lo supervisa e team di rapid response. Airbnb lo duna mas detaye di su politica despues cu Richardson hiba a cabo un revision di 10 dia pa determina e magnitur di e problema, y e miho manera pa drecha esaki.
Cinco persona a perde nan bida despues di un tiramento na un fiesta di Halloween na e suburbio Orinda di San Francisco. “Locual a pasa diahuebs na Orinda tabata horibel. Mi ta sinti pa e famianan y bisiñanan impacta pa e tragedia aki. Nos ta trahando pa duna nan sosten”, Chesky a bisa den un tweet.
E muhe kende a huur e cas a gaña su anfitrion di Airbnb, bisando cu e tabata huur e cas pa miembronan asmatico di su famia por scapa e huma di candela, segun un persona cu conocemento di e transaccion, kende no tabata autorisa pa discuti e informacion publicamente y a papia bou condicion anonimo.
E doño tabata sospecha e huur di un anochi riba Halloween, y prome cu cera e acuerdo, a recorda e huurdo cu no tabata permiti pa haci fiesta. Mas di 100 persona a yega pa e fiesta, segun polis.
Fiesta na cas pa largo ta un problema pa Airbnb, cu tin mas di 6 miyon oferta rond mundo.
Na 2018, e compania permanentemente a prohibi un huesped kende a hinca mas di 250 persona den un cas di huur di Airbnb na Seven Hills, Ohia, pa un fiesta no autorisa di Aña Nobo, mientras su anfitrion a sconde den un camber.
Na juli, dos persona a perde nan bida durante un party na un Airbnb na Pittsburgh.
Jessica Black ta un abogado y fundado di Moms Against STRs, cual ta pusha pa regulacion local di short-term rentals (huur pa un tempo cortico) na Texas. Black a bisa cu reportenan den medionan Mericano a documenta sikiera 30 tiramento den casnan di huur di Airbnb desde mei.
Den bisindario di Black, un cas di Airbnb a ser tuma over pa un grupo di film, cu tabata grabando un pelicula sin autorisacion. Ademas e ta preocupa cu un criminal sexual por keda den un cas di huur sin cu alerta e bisiñanan.
