CEO di AHATA, Tisa LaSorte: ‘Nos kier participacion real’ pa atende problema financiero

Aruba Hotel & Tourism Association (AHATA) como gremio cu tin di haber cu nos pilar economico cu ta turismo, kier participacion ‘real’ den e proceso pa soluciona e problema financiero cu tin den nos isla. Tisa LaSorte (CEO AHATA) ta haya cu esey falta ainda.

Durante un conferencia di prensa cu a conta cu presencia di e representantenan di gremionan di sector priva: ATIA, AHATA, Camara di Comercio (KvK), Aruba Food & Berverage Association y Aruba Timeshare Association, LaSorte a bisa: “Loke nos ta pidi ta participacion real, y no djis haci un reunion pa asina nan demostra manera tin participacion.”

E ta haya cu e preocupacion semper ta e falta di informacion real, caminda sector priva tin mucho nervio pa inverti. Esaki trece cune e preocupacion cu no tin mucho cupo di trabou pa nos hendenan.

Semper nan ta boga pa tin informacion y transparencia, ya cu nan ta elementonan di un bon gobernacion. AHATA ta haya cu un reunion cu nan a yega di sostene cu gobierno riba e topico aki, no ta suficiente pa bisa cu tabatin participacion real. Lo ideal –segun CEO di AHATA– ta pa bin cu un dialogo real, caminda nan por bin hunto pa busca e solucion cu mester pa nos isla.

E ta haya cu esaki ta un forma pa sigura cu e decision cu ta wordo tuma ta uno duradero. No un decision cu ta perhudica consumido y comercio na un manera nos economia por stagna. Tampoco un decision cu nos sector turismo ta haya nan mes cu e problema cu e turista ta haya Aruba mucho caro.

Un punto cu LaSorte a referi na dje ta cu no solamente sector priva tin cu haci esfuerso y sacrificio, sino gobierno tambe bahando nan gasto. AHATA a bin ta trahando un lista, caminda nan por mira cu e gastonan di e asociacion aki ta bin aumentando desde 2013 pa consecuencia cu impuesto, ta subi keto bay. E ta haya cu semper cu e tipo di gastonan aki ta keda introduci pa comercio, e tin un efecto directo riba nos consumidor y riba turismo en general.

No solamente nan ta pidi informacion, participacion y transparencia. Sino cu nan tambe ta pidi pa por haya un temporada pa e medidanan cu ta biniendo pa gobierno por atende cu e problema financiero.