Hefe ehecutivo di Boeing a bisa cu e compania a comete un ‘eror’ den e maneho di un sistema di advertencia di cabina problematico den su 737 Max jet prome cu e dos accidente a cobra bida di 346 persona, y el a priminti transparencia mientras e fabricante di avion ta traha pa pone e avion bek den aire.
CEO di Boeing, Dennis Muilenburg, a bisa reporteronan na Paris prome cu un show di aviacion cu e comunicacion di Boeing cu regulado, clientenan, y publico ‘no tabata consistente. Y esey ta inaceptabel’.
E Administracion Federal di Aviacion Mericano (FAA) a culpa Boeing di no bisa reguladonan pa mas cu un aña cu un indicador di siguridad den cabina di e avion mas bendi no tabata traha manera tabata su intencion.
Pilotonan tambe a expresa rabia cu Boeing no a informa nan di e software nobo cu ta implica den e accidentenan na Indonesia y Ethiopia.
“Claramente nos tabatin un eror den implementacion di e alerta”, Muilenburg a bisa.
El a expresa confiansa cu e Boeing 737 Max lo ta cla pa bula atrobe e aña aki. E modelo ta riba suelo mundialmente pa tres luna, y reguladonan mester aproba e solucion di Boeing pa e software.
Muilenburg a yama e accidentenan di e avionnan di Lion Air y Ethiopian Airlines un ‘momento definitivo’ pa Boeing, pero e ta kere cu e resultado lo ta ‘un compania mas fuerte y miho’.
Papiando prome cu e Paris Air Show, Muilenburg a bisa cu Boeing ta enfrentando e evento cu ‘humildad’ y enfocando riba reconstrui confiansa.
Na Merca, Boeing a enfrenta scrutinio for di miembronan di Congreso y FAA tocante con a reporta e problema involucrando un luz di advertencia den cabina.
E compania a descubri na 2017 cu un luz di advertencia, designa pa alerta piloto ora sensornan midiendo e angulo di e punta di e avion por ta ekiboca, unicamente ta traha si e aerolinea a cumpra un componente apart.
E sensornan di midi angulo ta implica den e accidente de Lion Air na Indonesia, y e accidente di Ethiopian Airlines na maart. E sensornan a faya, alertando software pa pusha e punta di e avion abou. E pilotonan no a logra tuma control di e avion bek.
Boeing a bisa FAA di locual nan a haya sa na 2017 despues di e accidente na Indonesia na october. Boeing y FAA a bisa cu e luz di advertencia no tabata critico pa siguridad aereo.
Muilenburg ta anticipa un cantidad limita di pedido durante e show di Paris, e prome show aereo mayor desde e accidentenan, pero a bisa cu ta importante pa atende pa papia cu clientenan y otronan den e industria. Ademas el a anuncia cu Boeing ta lantando su prome pronostico a largo plaso pa demanda di avion, notablemente entre crecemento sosteni na Asia.
