Durante e conferencia di prensa diaranson mainta, den cual a anuncia eliminacion di tur medida di COVID-19, CEO di Aruba Tourism Authority (ATA), Sra. Ronella Croes a elabora ariba impacto turistico, cambionan positivo y con e eliminacion di medidanan ta un punto clave den comunicacion internacional di ATA.
Sra. Croes a indica cu manera el a splica anteriormente e aña aki, incluso aña pasa, locual ATA a mira como desaroyo pa cu turismo na final di aña, sigur tabatin su impactonan riba turismo pa loke ta luna di januari.
El a comparti e resultadonan di bishitantenan na Aruba pa luna di januari, y esaki ta un total di 59 mil 573 bishitante stayover. Cual ta significa cu Aruba a perde 42% di locual ATA tabatin proyecta inicialmente cu lo a bishita e isla na luna di januari. Esaki obviamente tin diferente motibonan, entre otro e ola di Omicron y tambe cu CDC na Merca a pone Aruba riba nivel di riesgo cuater.
“Nos a cuminsa e aña cu mas reto y pa mi bay specificamente riba e resultado di januari kico esaki kiermen, esaki kiermen cu nos a recupera 63% di locual nos a ricibi na januari 2019, bayendo back na e ultimo januari normal”, el a agrega.
Croes a subraya tres mercado cu ATA ta sigui di cerca y ta reporta riba nan individualmente, mirando cu nan ta dunando bon resultado.
E prome ta Merca y loke el a señala pa e mercado aki ta cu den luna di januari 2022, compara cu januari 2019, Merca a recupera cu 70%. E segundo ta e mercado Hulandes y segun e CEO di ATA a indica, Hulanda a recupera cu un total di 98% na luna di januari. Por ultimo e mercado Colombiano, cu a recupera cu un total di 65%.
Sra. Croes a splica cu e impacto di e ola di Omicron y e caida den luna di januari a pone cu ATA a ahusta nan proyeccionnan pa e prome kwartaal di e aña aki, caminda nan a dicidi di aplica scenarionan conservativo pa luna di februari y luna di maart.
El a sigui splica cu pa luna di februari nan tabatin inicialmente den nan proyeccion un total di mas o menos 89 mil bishitante. Aworaki a ahusta e proyeccion aki y e ta na 62 mil bishitante. Croes a señala cu a base di cambionan cu Aruba a haci, nan ta mirando impacto positivo di e felxibilisacion aki. “Esey kiermen cu di nos banda y a base di nos analisisnan, nos ta kere cu nos lo por surpasa e cantidad di 62 mil bishitante den luna di februari”, el a bisa.
“Esey ta netamente locual nos ta pushando p’e te na e grado cu por, pasobra naturalmente e cambionan ta hopi recien y e impacto kisas nos no ta bay mir’e di e manera cu kisas nos ta desea. Nos ta spera mas cu e 62 mil, pero nos kier subraya cu nos no ta kere nos lo yega e proyeccion inicial di casi 89 mil bishitante pa februari”, el a agrega.
Croes a destaca tambe cu e tendencia ey lo continua tambe pa luna di maart unda e pregunta lo bira xi lo por yega caba na e proyeccion inicial pa luna di maart y sali for di e ciclo di scenearionan conservativo y acelera e recuperacion.
Pa loke ta e punto di eliminacion di medidanan, Sra. Croes a indica cu esey tambe ta un otro punto clave cu lo bay den comunicaicon internacional di parti di ATA. El a señala cu diferente paisnan internacionalmente cu ta saliendo dilanti ta papia di elimina medidanan di covid y esey ta algo cu naturalmente ATA lo subraya sperando cu e sigui stimula bishitanan pa Aruba.
Bayendo back na aña 2021, Croes a toca ariba e desaroyo di Aruba compara cu otro pais- y islanan den Caribe y pa esaki ATA ta usa cifranan di Caribbean Tourism Organisation
El a splica cu tin cuater destinacion cu a mira recuperacion mas halto na 2021 compara cu 2020 ora cu ta trata di turismo stayover, y Aruba ta un di nan, hunto cu Republica Dominicana, Puerto Rico y Sint Maarten. El a menciona cu Aruba ta na segundo luga den caribe cu un grado di crecemento di 19% compara cu 2020.
“Nos ta conciente cu cosnan por cambia, esey sigur nos sa. Pues nos ta anunciando awe mas flexibilisación y tambe nos ta hopi contento cu esaki lo trese e impacto cu mi a menciona caba, pero sigur tambe y locual a wordo menciona caba, finalmente sector horeca por bay back na normalidad y esaki ta hopi importante como impulso pa e sector comercial”, el a indica.
