CEO Aruba Tourism Authority (ATA) Ronella Croes: Pa Augustus Aruba lo mira un reduccion di cantidad di turista compara cu ultimo lunanan

E trabao di Aruba Tourism Authorithy (ATA) ta keda hopi importante pa monitoria e situacion di COVID na Aruba. Nos tur sa cu turismo ta e pilar economico mas importante na Aruba y mester keda monitor esaki pa e industria keda cana su caminda pa e economia poco poco por lanta bek.

Den conferencia di prensa di gobierno CEO di Aruba Tourism Authority (ATA) Ronella Croes ta duna di conoce cu cifranan a sali pa luna di Juli y por remarca algo cu ta hopi comenta unda cu a trece padilanti na varios ocasion ta cu e recuperacion economico y recuperacion di turismo ta canando sigur hopi hopi bon unda cu a cera luna di juli cu un total di 10178 turista cu a bishita Aruba.

Esaki ta pa prome biaha desde e reapertura di frontera Aruba a surpasa e cifra di 100mil bishitante den un luna . Segun CEO di ATA si mester wak e grado di recuperacion por wak cu e liña tabata bay ariba pa varios luna caba.

E situacion aki no mester tume cu e ta algo automatico , pero cu a tuma hopi esfuerso di hopi hende y trabaonan hopi duro. Tambe por mira incluso cu luna di juli e mercado principal cu ta e mercado di Merca a mustra un crecemento di 9% compara cu juli 2019.

Tambe e mercado Hulandes a mustra un crecemento di 39% compara cu juli 2019. Tambe por bisa cu aña 2019 tabata un aña di record riba varios tereno pa e mundo di turismo. Tambe AHATA a saca su resultado y por mira esun cu a bishita na juli tabata dispuesto pa paga 4% mas pa anochi pa un estadia na Aruba bao di e miembronan di hotelnan di AHATA.

Esaki ta un otro indicador di e demanda fuerte cu tin pa Aruba y e resultadonan fuerte ta bin ta mira. Loke cu mester tene cuenta cu ne ta cu tur e cifranan aki ta memey di un pandemia. E resultadonan cu ta comunica por bisa cu no ta algo normal y algo cu nos mester tuma como algo normal.

Sinembargo mester keda corda unda nos tabata un aña pasa apenas. No por enfatisa suficiente e forsa di recuperacion cu nos tabata mira pa Aruba , uno cu hopi pais na mundo no ta mira. CEO di ATA ta enfatisa cu no ta algo cu nos mester tuma como automatismo pero algo unico memey di un pandemia den un situacion di crisis.

Kisas e beneficio no a yega directamente na nos como ciudadano , pero e grado di recuperacion y e rapidez di esaki no ta cana dilanti sigur di tur proyeccion cu nos tabatin ora cu a traha planesnan y proyeccionnan pa e aña aki y conforme cu tabata bay di luna pa luna, pues e tabata un cuestion di tempo cu e ciudadano tambe a sinti e beneficio di e recuperacion aki na un manera mas rapido cu kisas lo a anticipa basicamente.

Sinembargo pa luna di augustus e panorama a bolter. Augustus lo mira un reduccion di cantidad di turista compara cu ultimo lunanan, pues e tendencia di cu cada luna nos ta mira mas y mas y mas lo no ta e caso den luna di augustus. Despues di a surpasa 100mil bishitante den luna di Juli ATA ta mira cu e luna aki y lo por duna nos 90 mil of 94 mil bishitante of te hasta menos cu 90 mil bishitante.

Tambe ta mira cu den september y october por ta mirando e impacto di locual ta e ola cu Aruba ta aden na e momentonan aki . E ta un echo cu cancelacionnan ta drentando pero lo keda monitoria cuanto esaki ta basicamente. E cancelacionnan ta mara na e preocupacion di e cantidad di casonan cu ta aumentando na Aruba y tambe e nivel di risico halto cu Aruba ta wordo asigna cu ne tambe.

Segun CEO di ATA un diferencia ta cu Aruba tabata porehempel pa Merca pa varios luna riba un nivel di risico halto pa loke ta trata biahenan pa Aruba. Sinembargo e diferencia awor aki unda cu tur e informacion, preocupacion y enfoke por medio di medianan internacional riba e casonan di Delta tambe a hunga un rol.

Loke cu tambe a haci un impacto ta cu Aruba a haya basta cobertura, mas cu lo normal riba e situacion di Delta na Aruba na momento cu a cambia e nivel di risico pa uno mas halto pa Aruba. Kico esaki kiermen ? Cu e conseho na Merca ta pa no biaha bay pa Aruba debi cu Aruba ta riba un nivel di risico halto di nivel 4.

Te na e momentonan aki algun hotel a comparti cu ATA cu den lapso di algun dia nan a mira nan grado di recuperacion baha pa luna di augustus tambe. ATA a haya informacion di varios compaña di tour di te cu 300 persona pa cada biahe asigna of reserva pa Aruba varios di nan a dicidi di cancela nan tour y estadia na Aruba. Sinembargo esaki ta negoshi cu no por bay recupera mas e aña aki, esaki ta entrada cu Aruba no ta bay ricibi mas pa medio di turismo y sigur pa hotelnan y tur cu ta depende di turismo.

for di aeroliñanan y liñanan crucero tin cancelacionnan cu a drenta, pero si den ultimo dianan ta mira cu e mundo di aviacion ta cuminsa señala si cu kwartaal tres di e aña aki lo ta uno hopi dificil. ATA lo keda pendiente di esaki.

CEO di ATA ta spera cu den e trayecto di recuperacion lo por ta bek na locual nos a bin ta mira ultimo lunanan, ban spera cu den luna di november esaki ta mas bisto. Di banda di ATA por sigui pusha hunto cu socionan tambe pa e perdida cu turismo di Aruba.

Sinembargo Avianca a confirma na ATA y a anuncia publicamente 13 ruta nobo unda cu lo duna un servicio nobo cu ta medellien Aruba. Esaki sigur ta algo valioso pa Aruba.

Tambe tin dos vuelo charter for di Brazil planifica pa september unda cu nan ta bon bendi y incluso e operador aki tin e intencion tambe pa amplia e vuelonan charter pa restante di e aña. Pero tambe alabes tin hopi nerviosismo den e sector mirando e situacion na Aruba y e miedo cu Aruba por bay den un lockdouwn.

Esaki ta e sentimentonan cu ta bibando pa cu e vuelo di Brazil, pero ATA mester a atende cu e punto aki pa kita e preocupacion bao di socionan cu ta representa negoshi y entrada pa Aruba, pero tambe preocupacion bao di turista y biaheronan.