CEO AHATA Tisa LaSorte: ‘Negoshi di apartamentoo of Airbnb tambe tin cu paga impuesto’

AHATA (Aruba Hotel and Tourism Association) a duna e punto di bista tocante e situacion di negoshi di hende cu tin cas ta huur apartamentoo of ofrece parti di nan propiedad riba e plataforma Airbnb. Bon Dia Aruba a puntra e asociacion si e negoshi aki tin algun efecto riba hotelnan.

CEO Tisa LaSorte a duna di conoce cu en berdad tin negoshi di e tipo aki na Aruba. Esaki ta creciendo, mirando cu tin mas apartamento. A cuminsa huur camber riba Airbnb, y awo tin apartamento traha den e cura di cas of ta crea un mini hotel.

E ta agrega cu ta contento cu a pasa un ley caminda tur tipo di apartamento mester busca un licencia, pero nan tin entendi cu esey no ta necesariamente pasando. Esaki por bira un preocupacion, pa motibo cu e negoshinan aki ta beneficia di e mercado.

E mercado posibel pa turismo riba Airbnb no ta paga e room tax of locual e hotel ta cobra, pues cada negoshi tambe tin cu contribui y paga e belasting, mescos tur otro hotel. “Si e ta un competencia mi no sa si ta berdad, pasobra ta diferente turista cu ta bin Aruba. Tin esunnan cu ta keda hotel pa ta mas cerca di beach”, LaSorte ta comenta

Sinembargo e ta bisa cu for di asiento di avion, nan sa cuanto turista ta dicidi di keda na un apartamento of hotel. Esey ta duna nan un bista di ken ta atrae na Aruba. Ta pa e motibo aki cu semper nan ta bisa cu ta miho calidad en bes di cantidad, pasobra e persona ta gasta mas na Aruba.

No solamente unda e ta kedando, pero e ta bay restaurant, shop, cumpra cosnan. Pues esey ta e analisis cu ta haciendo. LaSorte ta bisa si cu crecemento di negoshi ta bin dilanti. Nan ta keda bisa cu tin un preocupacion pa sigura pa tur negoshi paga impuesto, manera cu resto di hotel ta paga.

“E ta fuerte pasobra tin un 25% di persona cu ta keda na Airbnb of apartamento; anto si wak cu mercado ta creciendo. Mester un strategia pa sa kico ta dicidi y sigura e accion cu lo tuma pa duna resultado di locual ta pidi p’e.”

Tambe ta keda e parti cu e proteccion y siguridad den e otro area rond di Aruba – cu no ta area di hotel. El a menciona e parti di control di e calidad di e luga unda e turista ta keda, pa asina ora e turista yega na cierto area nan sa kico ta den bario of den area cu ta kedando. El a bisa si cu no kiermen cosnan malo ta pasando, pero ta cosnan por pasa y no por ignora.

Un punto cu LaSorte tambe a menciona pa Censo 2020 ta peticion di cifra. “E unico cos nos ta pidi pa nan haci ta tocante salario. (Pasobra pueblo tin un mal entendimento di salario di hotel), hende ta bisa cu e pago ta abou, pero cifra por demostra cu no ta berdad. Den censo hende ta pone e salario cu nan ta gana, den sector horeca tin salario abou pero ta gana miles den tips.”

Agregando cu tips no ta paga belasting pasobra no tin cu raporta esaki na departamento di Impuesto. Ta pidi pa persona cu tin trabou den horeca, si puntra nan, pa asina por tin mas informacion publicamente pa hende por compronde cu entrada no ta abou si mira tips.

LaSorte a bisa cu ta keda un reto pa organisacion, pa motibo cu mester keda wak e costo di haci negoshi y tur costo en general. No ta haya e hende pa haci e trabou cu ta cualifica of disponibel. E ta señala cu mester bin un diversificacion den mercado di turismo, pa tin algo stabiel y sigur pa 2020.