Di parti di AHATA ta bisa cu e parti di turismo a aumenta na 2018 y 2019. Sinembargo a menciona cu turismo ta fragil, unda cu por cambia den futuro. Nan ta bisa cu mester keda cu calidad, servicio y bon reputacion pa turista keda bin.
CEO di AHATA, Tisa LaSorte ta papia di desaroyo cu por tin den otro isla di Caribe, mirando efectonan di temblor riba Puerto Rico, of un ocasion cu a pasa na Santo Domingo ta pone cu otro isla ta tuma bentaha pa crece den nan turismo.
Pa ora di papia di turismo, LaSorte ta bisa cu mester ta cauteloso, pasobra tin e miedo cu hende semper lo por cambia, pues ‘turismo ta fragil’. Cualkier incidente por cambia futuro. Tabata conoci cu tin mas demanda pa turismo na Aruba, pasobra otro parti di region tabata afecta pa horcan.
Sinembargo, ora esey pasa mester keda cambia inventario. Anto mester keda cu e bon producto di calidad, servicio y reputacion, pero ta cuminsa competi cu productonan nobo cu por ta atractivo pa e turista.
Esey mester realisa pa asina traha pa gana e turista bek y ‘no mester kere cu nan ta keda bin bek semper’. LaSorte ta agrega cu esey semper ta keda un preocupacion. “Nos ta mirando nos cifranan, anto esey ta algo cu hende no ta ripara – cu tin crecemento ainda, pero e crecemento por baha.”
Aruba su turismo ta depende 80% di Merca. Economia Mericano awo por ta afecta pa eleccion, rumor di guera cu otro pais. Locual LaSorte kier splica no ta cu cos ta bay malo, pero simplemente, corda hende cu pa dia di mañan cosnan por bay diferente. Pa e motibo aki ‘mester keda traha y diversifica nos mercado’.
Cu esey no mester depende di 80% di Merca y mester traha pa gana e turista tur dia. “No por kere cu e bishitante ta keda bin asina numa. Esey nos ta cauteloso ora nos ta mira cu demanda ta cuminsa baha y mester traha mas duro pa gana hende pa nan bin”, e ta expresa.
Pero tambe e calidad servicio, cuida turista pa nan tin un bon siguridad. Un otro preocupacion cu a menciona ta cu lo bin mas camber na Aruba, anto esey ta crea cu tin mas inventario y balor ta cuminsa baha un tiki.
Un demanda cu tambe tin ta cu no ta haya empleado pa area di hotel. LaSorte ta bisa cu no tur ora ta haya empleado pa trabou cu tin disponibel. Esey tambe ta un rason cu por afecta e situacion di turismo.
Tambe a menciona cu turista ta bisa cu calidad ta bon, pero ta kere cu Aruba a bira caro. Esey ta un punto cu comerciante di asociacion di restaurant a menciona un biaha. LaSorte ta splica cu e gasto di haci negoshi ta subi.
LaSorte ta duna di conoce cu mester analisa y compronde e situacion. Por tuma nota cu algun hotel cu ta di balor, e turista ta gasta menos den food & beverage, y mester tene cuenta cu situacion asina.
E ta bisa cu tin palabracion cu gobierno regular, e desaroyo di otro isla y esun di Aruba ta un parti di combersacion cu tin. Tambe ta menciona cu gobierno ta na altura di preocupacion di costo pa turista, costo pa negoshi y costo pa cliente.
Nan ta altura di preocupacion y ta compronde cu gobierno mester tuma decision pa Aruba su finanzas, pero nan ta pidi pa nan tambe por ta inclui den combersacion, pa asina yuda bin cu solucion cu por tin menos efecto riba economia.
