Continuando cu informacion treci den nos edicion anterior di e futuro di Imsan, minister encarga cu Salud Alex Schwengle ta elabora riba detayenan di e cambionan cu lo bin. Y e posibilidad pa trata pashent turista na Imsan.
A puntra Minister Alex Schwengle pa splica ki tur ta bon ainda na Imsan y por wordo uza den e futuro di Imsan apart di e salanan di operacion cu a menciona cu tin espacio pa por lo menos 3 sala cu mester djis termina cu nan. El a splica cu e edificio mes ta traha den un structura pa cuido medico, pues si bay cambia destinacion di e edificio, lo mester bay inverti tanto placa pa cambia e uzo cu e no tin sentido. Gran parti di e facilidad a wordo crea pa tin capacidad di sala di operacion, e tin sistema di sterilisacion basta avansa caba cual ta cuestion di termina e trabou, pues no tin sentido pa elimina esaki y haci’e un hotel por ehempel. Tin capacidad tambe pa tin un prome auxilio, cual mester traha riba dje pasobra e no tin e nivel cu e mester tin ainda.
Citgo
No mester lubida cu e ta hopi importante pa mehora e calidad di prome auxilio pariba di brug mirando cu Citgo ta bay bin. Cu reapertura refineria e ta hopi importante pa hopi cerca di refineria tin un prome auxilio cu ta funciona na un bon nivel. E negociacionnan aki lo mester wordo haci pronto, ora papelnan keda firma entre Citgo y Imsan pa mira tur nan necesidadnan pe ora adapta un poco na necesidad di e refineria, Sr. Schwenglea bisa.
Necesidad Centro medico pariba di brug
Den pasado a experiencia cu ultimo minister no tabata pro Imsan y loke a wordo traha. Na Aruba tin custumber cu ministernan cu no gusta algo cu un otro a traha ta keda sin uza esey. pues a puntra minister Schwengle si e si ta pro Imsan y ta p’esey ta sigui uza esey. El a bisa cu e no por husga pensamento di otro politico esey ta nan asunto, e tin su mes pensamento. “Mi ta conoci di ta e miho politico den e sentido ey, mi ta mira mas logico y mi ta mira e necesidad pa tin un centro medico pariba di brug mirando e distancia y cu cierto decisionnan ta hancra caba. Pues no ta bay sinta discuti den e parti politico. A caba di inverti miyones den HOH pues pa e proximo 25 – 30 aña e lo existi. Si acaso aki 20 of 15 aña, pueblo hunto cu politico dicidi cu ta bay inverti memey di isla pa bin cu algo nobo, so be it. Sinembargo na e momentonan aki e decision ey no ta valido (decisionnan cu a wordo tuma hopi prome cu mi tempo). Y a wordo inverti hopi caba den capacidad di Imsan, pues lo ta pica pa no sigui cun’e.”
Foutnan cu lo coregi
“Banda di esaki a bin topa cu foutnan haci den algun gabinete pasa pa loke ta uzo di Imsan. Ehempel ta e liftnan pa transporta pashent cu un Brancard di ambulance no ta fit a lo menos cu pone para.” Si mira siguridad di candela, no ta adecua, pues tur e foutnan ey ta costa pa drecha aworaki. Aunke cu ta hopi gabinete anterior, siguridad pa candela e tempo ey tampoco tabata bon y si a haci inspeccion, e tabata klop, pues no por bisa cu ta e normanan a bira mas pisa y ta p’esey e no ta adecua, for di e tempo ey, e no tabata bon, Sr. Schwengle a enfatisa. Tur esaki ta costa cen pa mehora loke tin.
Tabatin varios inversionnan haci cu aparatonan cu awo sinta bay wordo uza tambe. Ta haya lamentabel pa e manera cu cos a bay cu Imsan den pasado, pasobra ora cu bo planifica algo asina costoso pa duna un servicio hopi avansa, mester plania esaki bon. Ta kere cu e intencion tabata bon, pero e ehecucion e tempo ey no tabata esun mas corecto. Siguridad contra candela no tabata bon, sistema electrico no tabata full bon, sistema di backup pa salvaguardia camber di operacion tampoco tabata adecuado.
Cumplimento rekisitonan JCI
Basicamente mayoria cos t’ey, solamente lo mehora nan pa cumpli cu rekisitonan di JCI. Pues dado momento kier pa Imsan bay ta un di e prome compleho medico den Caribe cu ta cumpli completamente cu e rekisitonan di JCI. JCI ta un sistema di acreditacion internacional por ehempel na Hulanda tabatin uno, cu ta un sistema di norma di calidad cu ta evalua e hospital cun’e. Nan ta evalua e parti fisico, siguridad, operacion y medico esaki ta cumbini nos pasobra e ora por bende capacidad extra cu tin. Por bende esaki cu Boneiro of turistanan cu ta bin Aruba por ehempel pa haya radioterapia p.e. E ora nan seguro internacional lo pidi pa acreditacion di e centro medico, cu esun di JCI, e seguro ta mas lihe pa firma contract y cumpra servicio na Aruba.
Director di Imsan Joel Raynherc a splica cu e departamento di radioterapia cu lo bin cun’e lo cuminsa cu un aparato di ‘bestraling’ cual no tin material fisico nuclear den dje, cual henter ora ta bay ta un peliger pa San Nicolas. E mashin aki lo ta ultra moderno cu ora e mester wordo uza ta cende esaki y e ta duna e bestraling y ora cu page cu e pashent ta cla, e no ta duna bestraling mas. Finalmente pa loke ta e departamento di dialyse cu lo wordo amplia, lo haci esaki den e “peritoneal dialyse” pasobra te cu aworaki ta haci hemodialyse so.
