Centro Famia di Criansa Arubano ta un instancia cu hopi no a yega di tende dje, pero ta un instancia cu ta encarga cu un trabou hopi importante pa bienestar di e muchanan di Aruba. Durante e evento ‘Topami na Mita’ Nathalie Tromp, trahado social di Centro Famia di Criansa Arubano, a splica Bon Dia Aruba kico ta e trabou cu nan ta haci, kico nan ta meta ta y ki expectativa nan tin pa aña 2023.

Tromp a splica cu Centro Famia di Criansa Arubano ta e unico instancia na Aruba cu ta atende cu tur locual cu ta cuido di criansa di un mucha. Nan ta encarga cu busca famia di criansa nobo pa un mucha, nan ta prepara e famianan di criansa y nan ta duna nan guia necesario unabes cu nan ta yudando un mucha, una bes cu nan tin un mucha ta biba den nan hogar.

Ta tuma contacto cu Centro Famia di Criansa Arubano na momento cu un mucha ta pasando den un situacion cu no ta bon pe den su propio. Esaki ta inclui negligencia, maltrato, abuso entre otro, y pa e motibo aki e mucha no por keda cu su famia mas. Na e momento ey sea ta busca un internado pa e mucha of ta busca un famia, wela, omo, bisiña y si no tin esey e ora ta busca un famia di criansa.

Tromp a sigui splica cu pa muchanan di criansa cu tin hopi tempo den internado, tambe nan ta busca un famia di criansa pa nan. “Ora mi papia di famia di criansa, e por ta un persona casa, compaña, soltero of tambe un pareha cu ta mesun sexo”, el a agrega.

E casonan di muchanan cu tin mester di un famia di criansa ta drenta na Centro Famia di Criansa Arubano a traves di instancianan manera Directie Voogdijraad, Directie Sociale Zaken, Fundacion Guiami, Stichting Verstandelijke Gehandicapten Aruba, entre otro. Tur por manda un peticion na Centro Famia di Criansa Arubano y e ora e proceso pa haya un famia pa e mucha ta cuminsa.

E necesidad pa famianan di criansa na Aruba ta grandi, Tromp a indica. “Mi tin cu bisa cu na Aruba tin un scarsedad grandi pa famia di criansa pasobra si mi tabatin suficiente famia den mi sistema mi lo djis yega busca cua famia ta match cu e mucha y mi tin di biaha, pero lamentablemente no ta bay asina pa motibo di e scarsedad”, el a remarca.

Pesey e ta apela na henter comunidad di Aruba. “Nos mester di e publico, nos tin mester di e comunidad di Aruba, di e medionan di comunicacion pa yuda trece nos mensahe cu nos mester di famia- y personanan cu ta dispuesto pa brinda un ayudo na e muchanan cu tin mester di un hogar”, Tromp a agrega.

Tromp a indica tambe cu e muchanan hopi biaha mester di un hogar temporal, pero esaki ta depende di e situacion di e mayor. Si e situacion di e mayor bay dilanti, e ora ta dicidi si e mucha por bay back cerca su famia, pero tin muchanan tambe cu door cu e situacion di e mayor no a bay dilanti, nan ta keda biba cerca e famia di criansa.

Tin algun rekisito importante cu famia- y personanan mester cumpli pa por sirbi como un famia di criansa pa un mucha. E persona of famia mester tin riba 21 aña di edad, nan mester biba na Aruba, persona of famia cu no a yega di comete un delito, no ta importa si nan ta casa, compaña of soltero, tampoco si nan tin yiu of no pasobra esey ta depende di e matching.

Algo hopi importante y necesario, Tromp a subraya, ta cu nan mester tin un bida familiar stabiel. Nan no por ta pasando den divorcio, perdida di trabou of perdida di un persona. Tambe nan mester tin un bon estado di salud y nan mester ta dispuesto, si yega asina leu, pa tin contacto cu e mayor biologico di e mucha.

“Centro Famia di Criansa ta haci un background check riba tur persona of famia cu acerca nos pa nos sa cu e mucha lo ta sigur cerca nan tambe”, el a enfatisa.

Pa loke ta aña 2023, Tromp a splica cu Centro Famia di Criansa Arubano tin pensa pa sali mas den medionan di comunicacion pasobra nan ta na altura cu ainda Centro Famia di Criansa Arubano no ta hopi conoci den comunidad y esey ta un punto cu nan ta desea di traha duro riba dje pa cambia.

“Aunke nos sa bin den medio di comunicacion y nos tin nos pagina di Facebook, asina mes bo ta tende cu no hopi hende sa di e fundacion. Dus ya toch pa sali den medio di comunicacion y asina trece nos mensahe cu e muchanan di Aruba cu no por ta den nan mesun cas, tin mester di famianan cu si por duna nan e hogar ey, sea temporal of pa semper pasobra den un famia nan desaroyo ta bay miho cu den un internado”, Tromp a finalisa.