Nathalie Tromp ta un trahado social di Centro Famia di Criansa Arubano cu den un entrevista cu Bon Dia Aruba a splica e retonan cu nan tin na e momentonan aki como un fundacion cu na luna di juni ta bay cumpli 20 aña.

Centro Famia di Criansa Arubano e aña aki, dia 3 di juni ta bay cumpli 20 aña di existencia, nan ta e instancia na Aruba cu ta busca famia di criansa pa cuida muchanan cu pa un of otro motibo, no por keda den nan propio cas. E muchanan aki temporalmente ta bay otro caminda y tur e tempo ey e mayornan ta haya e oportunidad di traha riba nan situacion cu ayudo di instancianan.

Hopi hende ta acerca na nan pa puntra si nan por adopta un mucha, pa esaki, Tromp a expresa cu cuido di criansa no ta adopcion, e ta trata di un ayudo temporal na unda cu ta traha pa e mucha por ser reunifica cu su mayornan biologico back.

E intencion no ta sali for di e punto di bista cu e mucha ta keda cu e famia di criansa, den caso di adopcion ta otro, e ora ey e famia cu ta adopta e mucha ta bira su mayornan legalmente y e mucha ta bira un parti di e famia pa semper.

Pa cuido di criansa no ta asina, mas cu algun muchanan ta keda cu nan famia di criansa a lo largo, e mayor su situacion tin cu demostra si e mucha por bay back of no, e famia di criansa por carga e custodia, pero esey ta keda den man di un hues.

Centro Famia di Criansa Arubano riba su rednan social constantemente ta anuncia cu nan ta den buskeda di famia di criansa y pa esaki, Tromp a comenta cu nan tin scarsedad, pa motibo cu no ta facil pa haya famia di criansa na Aruba for di e mesun comunidad chikito, nan ta keda di purba haya personanan of famianan cu ta interesa di yuda pa yuda un mucha cu no ta nan mesun yiu, un mucha cu ta bin cu su historia, debi cu el a pasa den cosnan tristo, cosnan doloroso y dificil, esey ta bay ser mustra den su comportacion dependiendo di e mucha, “esey ta haci cu cuido di criansa no ta facil.”

Tambe Tromp a sigura cu for di Covid pa famianan por yuda a bira mas dificil, awor nan ta mas consciente como por ehemplo, den nan estado financiero, stress tambe ta hunga un rol y cu tambe ta existi hopi mito negativo pa loke ta trata cuido di criansa cu ta pone cu famianan no ta acerca na e centro debi na e pensamento cu e muchanan despues di cierto tempo cu e famia di criansa, e mayor biologico por busca e mucha back y esey no ta asina.

El a splica cu nan ta traha cu instancianan y cu ley, “un mayor no por djis bin na cas di un famia di criansa busca su yiu, e no ta bay asina eynan, si un mayor ta mustra cu e ta apto pa por cuida su yiu back, instancia of un hues ta dicidi, no ta e mayor su mes ta dicidi,” el a bisa.

Tambe, famianan di criansa tin e miedo cu mayor ta bay busca problema y referiendo na esey, Tromp a sigura cu e 16 aña trahando den area aki, su persona solamente a yega di topa cu mayornan asina problematico, por ta 3 biaha so.

Un realidad cu Tromp a conta ta cu e famianan di criansa ta pensa cu nan ta cuida un mucha pa un tempo largo y e dia di mañan e tin cu bay back cerca e mayor, e ora ey nan ta puntra nan mes pakico nan ta haci esaki si despues nan ta bay keda cu tristeza y e mucha ta bay den mesun situacion back, pero Tromp a declara cu e mucha no ta bay back den mesun situacion, ni instancia ni hues ta dicidi esey si e situacion di e mayor ta sigui malo, instancianan ta monitoria con e caso ta continua.

“Lo cual cu ta bunita pa cuido di criansa ta e tempo cu e mucha ta cerca bo, sea ta seis luna of un aña, a bo a yuda build up e mucha eynan, algo cu un instancia no por haci pasobra un instancia no ta bo famia, un instancia no por duna e mucha e cuido cu famia ta dun’e, e amor y atencion, p’esey cuido di criansa ta ups and downs, momentonan bunita y tambe momentonan duro.”

Centro Famia di Criansa Arubano tin nan criterio na e ora di busca personanan of famianan cu kier aplica pa famia di criansa, nan tin cu pasa un proceso di screening y cumpli cu e siguiente rekisito: Nan mester ta riba 21 aña di edad, mester biba na Aruba, tin un bida familiar stabiel, no a yega di comete un delito, no ta importa nan situacion sentimental of si tin yiu of no, esey ta depende di ki matching e tin mester pa cu e mucha. Ta importante pa ta habri pa guia, habri pa tin contacto cu trahado social y pa tin contacto cu e mayor biologico.

Si tin personanan interesa y ta cumpli cu e rekisitonan aki menciona, por tuma contacto na e number di telefon 582.0088 y 582.0089 of por manda mensahe directo na nan Facebook Page Centro Famia di Criansa Arubano pa haya un cita y por cuminsa un proceso di screening.

Recientemente riba e red social menciona nan a publica cu nan tabata den buskeda di un famia di criansa pa un baby di ocho luna, Tromp a informa cu nan a haya varios famia cu ta interesa y cu ta den proceso.

Pero nan no ta haya hopi caso di baby cu tin mester di un famia pa cri’e, aworaki nan necesidad di mas grandi ta pa muchanan di entre 10 pa 16 aña debi cu hendenan ta pensa cu ta dificil cuida di nan pa via di nan comportacion, sinembargo, Tromp a señala cu e muchanan aki tambe merece hende cu lo kier duna nan atencion, cariño y stabilidad, cu kier laga nan ta mucha atrobe, “tin muchanan cu tin asina tempo den internado wardando pa e situacion di nan mayornan mehora of pa haya un famia cu ta willing di bay pa nan cu nan ta keda crece den un internado y esey no ta bon pa nan desaroyo ni pa nan amor propio, ora bo ta haya un famia cu ta inverti den bo emocionalmente, esey ta algo cu ta yuda masha hopi mes den nan crecemento,” Tromp a sigura.

Pa finalisa, Tromp a laga como mensahe na e lectornan cu e muchanan no a kies pa lo cual nan ta pasando of a pasa aden, no ta nan culpa cu nan ta den un internado y cu nan mester di un famia di criansa, nan tin mester di ayudo awor, nan ta indefenso y cu por ta nan tin nan comportacion pa por defende nan mes di un situacion pa asina por sobrevivi, aworaki nan tin mester di adulto den nan bida cu por yuda nan ta mucha atrobe, pa nan sinti sigur y pa nan por desaroya lo miho posibel.