Ayera tabata un dia masha special pa Centro Famia di Criansa Arubano, e unico instancia cu ta maneha cuido di criansa na Aruba a celebra nan 20 aña di existencia na unda nan a splica cu nan tin mester di famianan di criansa y esey ta keda un di nan principal reto.

Pa esaki, Nathalie Tromp trahado social di Centro Famia di Criansa Arubano a splica cu e tin 16 aña trahando den instancia aki y nan ta contento cu den e 20 aki nan ta bezig pa haya famianan di criansa, “desde pandemia di Covid-19 e parti di haya famia di criansa a bira un tiki mas dificil na unda cu por ta antes tabatin dificultad pa haya famia di criansa pa muchanan riba 8 y 9 aña pero awor e edad a baha te cu 5 of 6 aña, den edadnan aki nos ta haya dificil pa haya un famia di criansa pa nan,” Tromp a sigura.

Pa e motibo ey, nan ta considera e trabou di prensa importante pa asina ey e informacion por yega na comunidad y nan por haya famianan di criansa.

Pa aña nan ta busca entre 10 cu 12 famia pa muchanan entre 0 te cu 18 aña, e rol di un famia di criansa ta pa yuda un mucha di un manera temporal, pa duna e cuido cu muchanan no por haya di nan mesun famia mientras cu e mayornan di e instancianan concerni ta haya e ayudo cu nan tin mester pa nan situacion drecha, mientras tanto, e famia di criansa ta brinda e mucha stabilidad, seguridad, atencion, amor y tur lo cual e mucha tin mester cu un internado no por ofrece.

Ora un famia di criansa y un mucha ta adapta na otro esey ta algo natural manera Tromp a sigura, un famia di criansa ta haya preparacion den un principio cu no tin garantia, loke ta nifica cu e chens t’ey cu e dia di mañan e mucha lo regresa na su mayor back y esey a nan como instancia no tine den nan man “pero semper nos ta bisa e famia di criansa si cu nos ta informa nan di cada paso cu ta sucede, si esey ta pasa e famia di criansa ta haya preparacion y guia na esaki.”

Hopi hende ta acerca na nan pa puntra si nan por adopta un mucha, pa esaki, Tromp a expresa cu cuido di criansa no ta adopcion, e ta trata di un ayudo temporal na unda cu ta traha pa e mucha por ser reunifica cu su mayornan biologico back.

E intencion no ta sali for di e punto di bista cu e mucha ta keda cu e famia di criansa, den caso di adopcion ta otro, e ora ey e famia cu ta adopta e mucha ta bira su mayornan legalmente y e mucha ta bira un parti di e famia pa semper.

Nan tambe ta tene na cuenta cu e mucha su emocionnan, por ehemplo nan no ta pone un mucha bao encargo di cualkier famia, e ta implica un proceso cu ta tuma su tempo, famia ta bay internado pa conoce e mucha y asina ey cuminsa crea un conexion cu e mucha prome y despues ta sali cu nan y pasa e dia loke ta keda hisa e tempo cu e famia ta pasa cu e mucha.

Di 10 mucha, 3 di nan ta bay cerca nan mayor back pa motibo cu e mayoria di nan ta keda cu e famia di criansa.

Nan tin contacto cu famianan cu a yega di bira famia di criansa for di momento cu Centro Famia di Criansa Arubano a cuminsa te cu awor, nan ta sigui papia cu e muchanan cu a bira grandi y nan ta den famia di criansa ainda y con nan bida a sigui “por ta un of dos di nan no tabata un success story, tabata un love story, ora bo ta tende con e muchanan ey a sigui den famia di criansa y nan tin contacto cu nan mayor tambe, esey pa nos ta algo hopi importante.”

E problematica ta varios, tin di nan cu tin problema financiero, adiccion, relacion, social, door di nivel di inteligencia cu ta pone cu ta dificil pa nan cuida nan mesun yiu segun Tromp a señala.

Centro Famia di Criansa Arubano ta traha conhuntamente cu otro departamentonan vooral cu Fundacion Guia Mi y cu Directie Voogdijraad Aruba.

Di su parti, Anneke Nicolaas cu ta director di Centro Famia di Criansa Arubano y Fundacion Guia Mi a bisa cu 20 aña pasa e tabatin e vision di lanta e fundacion aki hunto cu seis organisacion mas como Imeldahof, Casa Cuna, entre otro, pa motibo cu nan tabata buscando famianan pa nan mes pero e preparacion y guia tabata varia hopi y na hunto a purba pa traha den un organisacion y esey a bira Centro Famia di Criansa Arubano.

Nicolaas a comenta cu den ultimo 20 aña nan a logra yuda hopi famia na Aruba y “esey ta algo hopi bunita y nos mester sigui busca famianan, pero esey ta keda un reto vooral pa e muchanan mas grandi, pa hopi biaha e babynan ta logra pero muchanan mas grandi ta mas dificil y nos ta kere cu nan tambe mester di un hogar y amor di un famia.”

Pero problemanan social ta permanece segun cifranan di aña 2023 y nan mester sigui cu e trabou di por haya famianan di criansa pa e muchanan cu tin mester di dje.

“Nos tambe mester ayudo di comunidad, pa nos tur traha hunto y soluciona, pasobra tin hopi problema na Aruba y mi ta kere nos tin cu traha hunto pa soluciona e problemanan aki,” Nicolaas a afirma.

Centro Famia di Criansa Arubano tin nan criterio na e ora di busca personanan of famianan cu kier aplica pa famia di criansa, nan tin cu pasa un proceso di screening y cumpli cu e siguiente rekisito: Nan mester ta riba 21 aña di edad, mester biba na Aruba, tin un bida familiar stabiel, no a yega di comete un delito, no ta importa nan situacion sentimental of si tin yiu of no, esey ta depende di ki matching e tin mester pa cu e mucha. Ta importante pa ta habri pa guia, habri pa tin contacto cu trahado social y pa tin contacto cu e mayor biologico.

Ayera mainta nan a tene un celebracion chikito pa nan 20 aña di existencia y den esaki, nan a duna un regalo na Sr. Robert y Sra. Samantha v/d Kamp cu a ser scogi como famia di criansa di aña.