E proyecto pa bin cu un centro di radio terapia riba nos isla pa trata e pashentnan di cancer ta canando, aunke e no ta un proyecto cu lo bira realidad pronto.
Minister di Salud Publico Alex Schwengle a declara na Bon Dia Aruba cu un proyecto asina ta demanda hopi trabou mas di loke e mes por a realisa.
Actualmente nan ta den e delaster proceso pa entrega un documento riba e costo di operacion di un centro di oncologia/radio terapia pa wak si e ta factibel. E otro siman e documento lo wordo presenta na e mandatario y na AZV pa asina nan lo por tuma e decision definitivo pa bin cu e proyecto aki na centro medico San Nicolas, esta IMSAN.
Investigacion
Sinembargo e mandatario a afirma cu nan ta basta leu cu ne. Nan a haci un estudio di factibilidad pa un radio terapia na Aruba, y e ta algo positivo. El a laga sa cu den principio tur cos ta mustra cu e lo bira un realidad, pero nan mester haci nan debido investigacion of tarea riba un plan strategico. “Esaki ta e ultimo test cu nos mester.”
Si tur cos ta sigui cana riba bon caminda, minister Schwengle ta kere cu pa otro aña nan lo inicia cu e plan strategico mes pa bin cu e radio terapia. E ta considera cu si eventualmente na januari proximo nan lo por cuminsa cu e proyecto aki, lo tarda alrededor di dos aña prome cu nan lo duna e prome radio terapia na Aruba.
