Aunke Departamento di Salud Publico (DVG) semper ta masha cauteloso pa revela nomber di pashent y sitio relaciona cu e pandemia di e coronavirus/Covid-19 na Aruba, pa asina protege y respeta e privacidad di cada pashent. Pero e biaha aki a dicidi di haci un yamada publico.
PR di DVG, Jurette Croes a informa cu relaciona cu un caso positivo di COVID-19, DVG ta haci un yamada na tur cliente cu entre 26 di maart te cu 4 di april 2020 a bishita y haya servicio na Secret Beauty Salon, situa na Avenida Milo Croes 93, pa nan tuma contacto cu DVG na call center: 280-0101. Esaki si e persona tin sintoma di COVID-19, manera tosamento seco, dolor di garganta, keintura y perdida di holo of smaak.
El a bisa cu tin circunstancianan cu mester haci un excepcion pa motibo cu bo por a wordo exponi na e virus. Y nan ta evalua cada caso cu si pa salubridad publico ta necesario bin cu informacion tocante un pashent den cuadro di e risico cu lo por pone otro personanan.
Update.
Ayera atardi, PR di DVG a duna un update di e casonan unda no a wordo reporta niun caso nobo durante e ultimo dianan, incluyendo e fin di siman y dialuna. Ta asina cu te ayera 2’or atardi tabatin total 92 caso positivo. Di cual 32 persona a yega di recupera y actualmente tin 60 casonan activo di Covid-19. Negativo tin 1.062 di un total di 1.154 persona cu a wordo getest. Ademas 114 persona ta den cuarentena actualmente.
Jurette Croes a bisa cu centro di diagnostico a experiencia durante e fin di siman ultimo un caida ‘hopi drastico’ den e cantidad di yamadanan di personanan cu tin sintomanan.
Igualmente el a ripara cu ayera e trafico tabata basta druk riba caminda. P’esey el a enfatisa cu e medida di ‘shelter in place’ ta na vigor ainda. Pues no tin cambio den esaki, y e sitionan cu no ta esencial mester keda cera. Y esunnan esencial mester regla paden y pafo e distancia fisico y tambe mester zorg pa no tin aglomeracion di persona. Si e localidad no ta percura pa esaki, autoridad por cera e localidad aki.
