Den combersacion cu Giancarlo Nunes, Research & Conservation Manager na Fundacion Parke Nacional Aruba, e ta bisa cu su trabao por wordo parti den dos parti: uno ta riba conservacion di especie anto e otro ta riba e parti di habitat, pues e ecosistema unda e bestianan ta biba. Mester enfoca riba tur dos na mes momento, anto pa loke ta e habitat hopi biaha tin di haber cu e flora, e vegetacion di Aruba.
Bishitando e ‘Green House’, e Centro di Cultivo na Parke Nacional por mira con esaki ta bayendo hopi positivo den proceso di cultiva matanan cu ta bayendo perdi y ta hopi importante pa nos ecosistema.
“E vegetacion di Aruba a haya hopi daño for di tempo di colonisacion caba, e matanan a haya hopi daño y nos a perde hopi mata asina, e colonistanan tambe a introduci cabrito, burico, baca y esakinan a zorg e ora cu e matanan no por a crece back,” Nunes ta comenta. E kapmento di mata ta con nos a perde nos matanan y introduccion di e otro tipo di bestianan a zorg despues e ora cu e mondi grandi mes no por a crece bin back, awor 500 aña despues nos por mira un Aruba cu a resulta di esey; nos tin hopi cadushi y mata cu sumpiña cual no ta e Aruba di pasado segun Nunes. Nos tabata tin hopi mata di fruta, hopi mata medicinal cu e cabritonan tambe gusta, y e simianan aki ta den tera pero nan no ta haya chens pa crece back.
Fundacion Parke Nacional Aruba ta bezig cuater aña caba cu nan proyecto di Centro di Cultivo, a cuminsa cu analisis di e situacion, busca informacion riba especie di flora di Aruba cu ta di nos isla y ta bayendo perdi. Palicia Cora por ehempel ta un mata hopi importante pa e bestianan di Aruba, pa nos parhanan di Aruba, tin menos cu 10 di esakinan den wild ainda. “Door cu e ta asina tiki, esey ta un di e especienan di flora cu nos ta enfoca hopi pa trece nan back, anto esey ta e base di e programa pa amplia diversidad di flora na Aruba, specialmente den areanan di Parke.”
Un analisis ta wordo haci di cua ta e matanan di Aruba cu ta hopi scars pa cultiva esakinan y cuminsa introduci esakinan back den Parke. Ampliando e diversidad di nos Flora, automaticamente ta haci cu lo amplia diversidad di nos Fauna, mas cuminda pa nos parhanan, mas areanan pa insectonan etc.
E bida mes lo amplia riba nos isla si nos percura cu e habitat, e flora, e vegetacion di Aruba, ta mas sano.
E idea pa cu e Centro di Cultivo ta pa bay planta e matanan aki rond di Parke. Algun test a wordo haci caba, ta bezig ta test diferente manera pa planta, pero no por compara hopi areanan pafo di Aruba cu parke Arikok por ehempel. “Nos mester wak kico lo traha den e areanan di Parke, nos a siña masha hopi mes y nos a yega e punto cu unabes nos cultiva bastante den e greenhouse cu nos por bay echt cuminsa yena Parke back cu e matanan nativo di Aruba cu hopi hende ni sa cu nan ta existi mas,” segun Sr. Nunes.
