Centro di ciudad hayando atencion fe prome cu comerciantenan a manda carta cu deadline

Segun minister encarga cu Transporte Otmar Oduber, pa loke ta Aruparking, ya ta dunando centro di ciudad atencion caba prome cu e carta a sali unda cu nan pone un deadline. Miembronan di Camara di Comercio, specificamente comerciantenan den caya grandi a manda carta pa minister expresando nan preocupacion riba diferente punto pa loke ta funcionamento di Aruparking den caya grandi.

E comerciantenan a manda e carta aki 25 di november (fuente NoticiaCla) pa minister y a pone un deadline pa e contesta e carta aki no mas tarda cu dia 3 december cu a pasa. Sr. Oduber ta reacciona riba e deadline bisando cu ya e situacion cu e comerciantenan ta expresa den e carta tin atencion y por mira esaki na e 8 fechanan di parking gratis den centro di ciudad pa luna di december. Cual ta un di e puntonan cu e comerciantenan ta menciona den e carta.

Tambe e mandatario ta bisa cu hopi esfuerso ta wordo haci di banda di gobierno y ATA, y cu Aruparking tambe a trece diferente proposicion pa traha hunto cu comerciantenan pa e situacion bira uno cu ambos ta beneficia di dje. Sinembargo Sr. Oduber ta di opinion cu e comerciantenan mes no ta bin cu alternativa cu ta elvolve algo cu nan mes por haci pa mehora e situacion. Ehempel di plan cu ta andando cu ATA aworaki ta ponemento di borchi di señalamento den henter centro di ciudad (desde waf) cu ta mustra unda ta haya caya grandi entre otro. Tambe el a menciona esfuersonan cu ATA a haci den pasado pa pone fiesta den caya grandi cu ta crea oprotunidad di benta, sinembargo algun comerciante so ta habri nan porta na e ocasion.