Vanessa de Kort lider di proyecto na Sede di Bario Savaneta a informa cu dia 24 di juni nan ta bay celebra e Dia di Dera Gay na sede di bario pa asina ey continua engrandeciendo e cultura di Aruba.
E anochi aki cu ta cuminsa for di 6:00pm y ta culmina 10:00pm ta bay tin presentacion musical di Frank Croes y su Tipico Pega Saya, Grupo di baile Masiduri, Grupo Nos Cultura y pa cera e anochi tin como invitado Ivy y su grupo, ademas tambe ta bay tin e gruponan di competencia di Dera Gay den categoria infantil, hubenil y adulto.
Na mesun momento, nan tambe ta bay tin competencia di Dera Gay pa loke ta trata e miho trahe di Dera Gay.
E anochi aki tambe nan kier haci uso di oportunidad aki pa engrandece cultura di Aruba y el a sigura cu nan tabatin hopi aña sin organisa un competencia di Dera Gay na Savaneta, despues di pandemia di Covid-19 e actividadnan na e luga aki a disminui hopi y de Kort tin e intencion di pone e sede di bario back den funcion.
“Nos a cuminsa caba cu un par di competencia di volleyball, Savaneta ta conoci pa su volleyball y su zaal futbol, e gruponan cu semper tabata t’ey tabata Savaneta Six Stars, La Fama, Racket Club y tur e gruponan ey antes tabatin un nomber traha caba y tiki tiki ta bay cu e parti mas recreativo back loke a haci Savaneta grandi den su añanan 60 y 70 te cu 80.”
Tambe e intencion ta pa recauda fondonan pa por renoba e sede di bario, stage di e luga ta di añanan 30 e cual tambe a sirbi pa haci teatro y den ultimo añanan ta ripara cu teatro na Aruba tambe a perde su nomber y tambe a perde su importancia, “esey ta un motibo tambe pa trcel’e back y restaurel’e pa por usel’e no solamente pa teatro pero tambe por us’e pa baile, canto y otro actividadnan,” el a bisa.
De kort a sigura cu e costonan pa por restaura e stage ta rekeri di hopi placa y cu te ainda nan no a haci un presupuesto di esey pero nan si sa cu e ta algo cu mester di fondonan suficiente.
Igualmente el a sigura cu nan ta bay sigui haci mas actividad pa por restaura tambe e cancha di futbol y volleyball, e dak di e luga tambe a bay atras, esey kiermen cu tin hopi cos cu mester di atencion segun el a señala.
Tambe el a haci un yamada na habitantenan na unda na unda nan ta solicitando personanan activo pa e parti boluntario y nan tin mester di dje mirando cu nan kier haci actividadnan y esey ta implica e trabou y esfuerso di mas hende.
Inscripcion pa participa pa actividad di Dera Gay ta gratis, manera de Kort a señala unda personanan interesa por tuma contacto na su telefon 594.4570.
Dera Gay un fiesta cu tin varios historia di su origen
E fiesta cultural di San Huan (Huan Bautista) conoci den boca di pueblo manera Dera Gay ta data desde aña 1862 y ta celebra tur aña riba 24 juni. E storia di e origen di e fiesta religioso y cultural aki conoce varios version.
E origen religioso ta relaciona cu fecha di nacemento di San Huan Bautista pero na mes momento e origen cultural ta mustra riba e fiesta di cosecha. Aunke tin un aspecto religioso, Dera Gay ta mas tanto conoci como un fiesta cultural cu entre otro musica, baile y canto.
Colornan cu ta domina ta cora y geel. Geel ta simbolisa e palo di kibrahacha cu ta floria y cora como simbolo di candela cu ta cende riba e anochi prome pa anuncia e fiesta di e siguiente dia.
Segun tradicion e fiesta ta cuminsa dia 23 di juni ora cu e cunukeronan ta cende sobra di palo di maishi na candela y pa asina cuminsa prepara pa e temporada nobo di cosecha. E cendemento di candela ta manera un limpiesa pa despues por cuminsa di nobo.
Dia 24 di juni, despues di bahada di solo, e fiesta di San Huan ta cuminsa den diferente districto cu baile di Dera Gay, baile di bula candela y baile di bandera. E baile di candela ta pa proteccion contra malesa y mala suerte. E baile mas conoci ta esun di Dera Gay, unda e hende homber cu su wowo tapa y cu un palo den su man mester purba mata e gay. Antes e bailamento aki ta tuma luga den sabana cu un gay bibo dera.
Awendia ta usa un gay traha y e baile ta den club. Esunnan cu sa baila ainda den sabana of riba veld di tera ta usa un calbas. Tambe tin un baile di bandera, unda ta pone diferente banderin den suela y un persona cu wowo tapa cu lenso ta busca e banderinnan. E ceremonia ta acompaña pa musica folklorico.
E instrumentonan musical cu ta resalta ta fio, wiri y tambu. E cantica di Dera Gay mes ta data desde 1862. Locual no ta falta den e celebracion aki ta cuminda crioyo y bebida. E fiesta di San Huan y Dera Gay a bira hopi popular atrobe despues di añanan setenta bou di poblacion local como tambe na e scol ta duna atencion na e fiesta popular aki. “San Huan ta bin, San Huan ta bay”.
