Diasabra ultimo na Centro di Bario Playa Pabao a tuma luga un actividad organisa entre varios organisacion pa conmemora e Dia Mundial di Refugiado di UNHCR (Agencia di Refugiado di Nacionnan Uni), pa duna di conoce cu hunto cu programa y diferente politica pa proteccion y apoyo, nan ta sigui traha hunto pa haya un solucion na e situacion dificil cu migrantenan di paisnan rond mundo ta biba.
CEDE Aruba, HIAS Aruba, VeneAruba Solidaria, International Organization for Migration (IOM) y PADF (Panamerican Development Foundation) tabata e anfitrion di e feria multicultural cu a tuma luga diasabra ultimo 22 di juni na Centro di Bario Playa Pabao pa celebra e Dia di Refugiado, cual ta celebra e forsa y curashi di e personanan cu ta haya nan mes obliga di huy di nan pais pa motibo di conflicto of persecucion.
Den e feria multicultural aki, na momentodi yegada a ricibi e publico den un ambiente biahero, unda nan a haya un paspoort pa biaha rond di mundo. E idea tabata pa nan recore tur stand di diferente pais manera Venezuela, Colombia, Ecuador, Peru, Republica Dominicana, Haiti, y Aruba, ademas di instancianan como Fundacion Contra Violencia Relacional, Bario Unico di CEDE y asina haya un stempel pa participa pa gana premio.
E evento tambe a conta cu baile cultural, musica y actividadnan ademas esnan mas chikito.
Recientemente, UNHCR den su rapport di Tendencianan Global di aña 2023 a destaca e importancia di solidaridad y solucion pa e refugiadonan, e number di persona obliga pa huy na 2023 a alcansa e cifra di 117, 3 miyon hende cu a bandona nan pais debi na persecucion, conflictonan, violencia y violacion di derechonan humano, esaki ta sucede na cada 1 di 69 persona rond mundo.
Aruba ta acohe e porcentahe di mas halto di personanan desplasa bao forsa y e poblacion di e isla tin aproximadamente 17.000 refugiado y migrante di Venezuela.
Irene van Rij ken ta fungi como Head of National Office di UNHCR na Aruba a señala cu dia 20 di juni ta e dia oficial unda cada aña ta celebra e firma di e convenio pa refugiado “cu e dia aki nos kier destaca e situacion di refugiadonan y migrantenan cu ta aki na Aruba na unda nan a laga atras nan cas y nan ta purbando di integra nan mes den comunidad. Ta un refugiado of migrante ta un muestra di balentia y e personanan aki tin un capacidad humano importante unda e comunidad di Aruba por probecha di dje.”
Di su parti, Elsa Krosendijk ken ta coordinador di evento y proyectonan di CEDE Aruba a splica cu nan a ser acerca door di PADF pa haci un evento multicultural hunto cu otro organisacionnan cu ta traha na beneficio di refugiadonan “pa haci un evento y duna informacion cu nos ta traha cu hopi empatia pa nan tambe y cu e feria aki ta trece tur e paisnan hunto cu Aruba pa tin un solo celebracion riba un dia.”
Ta prome biaha cu CEDE Aruba ta forma parti di e organisacion aki mirando cu nan tambe ta traha den e parti social y nan kier pone nan contribucion na e iniciativa, el a comenta tambe cu den e proyecto cu nan tin denomina bario Unico nan ta drenta den comunidad y nan ta mira cu tin hopi hende cu ta biba indocumenta “pa sa cu nan tin un centro di bario unda nan por yega, pa laga e muchanan siña un ofishi cu por yuda nan drenta den parti laboral despues, conoce cultura di un pais cu por ta bo no sa di dje y mi ta kere esey ta e meta principal di e proyecto aki unda cu nos tur ta traha hunto.” El a finalisa.
