Directiva di Centro di Bario Lago Heights a informa cu un proyecto hopi bunita a cuminsa tuma luga na e centro di bario aki dirigi pa e muchanan y hobennan di San Nicolas y su bisindarionan.

Nan a anuncia cu nan ta bay haci e inauguracion di nan centro di bario cu a haya un transformacion y e ceremonia di inauguracion ta bay ta diasabra 20 di april pa 12.30 di merdia unda pueblo di Aruba henter ta invita pa celebra e crecemento y servicio di e centro aki.

Personanan cu lo asisti ta bay tin oportunidad di mira e servicionan cu a mehora den e centro danki na contribucion di diferente sponsornan y di nan director caminda Shalinie Flores coordinador di e centro di bario a sigura cu “nos ta hopi gradici cu nos sponsornan pa nan apoyo y nan compromiso cu nos comunidad, nan generosidad a hunga un papel fundamental den e transformacion di nos centro, permitiendo nan atende miho e necesidadnan di nos habitantenan y asina fomenta un sentido di unidad y di pertenencia,” el a bisa.

Un di nan sponsor ta Edmentum, un compania Mericano cu ta crea tecnologia di aprendisahe diseña pa apoya maestronan cu e obhetivo di haya resultadonan positivo de nan studiantenan, nan ta kere cu cada studiante ta merece e oportunidad di prospera den cualkier luga na unda e aprendisahe ta produci, sea pa nan keda al dia cu nan les, mantene nan den caminda of siña nan pa futuro.

Ademas, e proyecto aki tambe a haya ayudo di CEDE Aruba e cual ta dedica na desaroyo comunitario cu ta fundamental pa bira realidad e vision cu nan tabatin como centro di bario, “CEDE Aruba ta orguyoso di por a introduci Edmentum den proyecto aki y asina ambos por duna apoyo creando un comunidad mas inclusivo y empodera,” Daniel Tecklenborg, Director de CEDE Aruba a declara.

“Duna algo back na comunidad ta un parti fundamental di loke nos ta y nos ta sinti honra di traha cu un grupo increibel di socio pa por remodela e Centro di Bario Lago Heights,” Jamie Candee, CEO di Edmentum a bisa.

Di e manera aki, directiva, boluntarionan y participantenan di Centro di Bario Lago Heights ta invita pueblo di Aruba pa asisti na ceremonia di inauguracion di renobacion di nan centro di bario cu ta dedica na comunidad di Seroe Colorado, Lago Heights, Esso Heights, De Vuyst, Kustbatterij, Nijhoffstraat, Essoville, Yuwana Morto y bisindario.

Potretnan ta cortesia di Centro di Bario Lago Heights nan FB page.