For di september di e aña aki te cu april di 2024 Centro di Bario Lago Heights (CBLG) na San Nicolas ta bay tin un programa nobo cu actividadnan yama ‘Learning Links’ segun loke coordinado di e programa Shalinie Flores a anuncia den un conferencia di prensa.

Manera a informa, e proyecto aki ta cuminsa for di september 2023 te cu april 2024 y ta consisti di varios tayer cu ta trata diferente disciplina y area di desaroyo, incluyendo: Plantacion, Arte y Expresion, Recreacion Educativo pa Famia, Cosemento, Arte Culinario Sostenibel, Empoderacion Propio, Talento y Pasion y Resiliencia. Ademas, ta bay tin un Grupo di Sosten pa Mayor y lo termina tur luna cu un fiesta di Bario unda lo presenta e resultado di cada tayer y unda lo celebra tambe e dushi San Nicolas segun Flores a bisa.

‘Learning Links’ ta presenta conhuntamente cu fundacionnan, profesionalnan y comerciantenan y ta bay ta enfoca riba aspectonan util cu participantenan por aplica mes ora den nan bida diario.

Flores a informa cu a crea ‘Learning Links’ pa yuda hoben, famia y tambe mayornan adulto (60+) pa uni, siña hunto y sostene otro den un ambiente sano.

Ta un hecho, cu ora mayoria ciudadano di un pais experencia crecemento personal, facilmente comunidad tambe lo progresa, pa e motibo ey, ‘Learning Links’ lo brinda na grandi y chikito e chens pa cultiva e sentimento di por siña cos nobo, di sinti nan mes capaz, balora y aprecia, ademas ta bay combina charla y participacion activo pa brinda un miho experiencia y crecemento riba tereno social, emocional of recreacional, si logra aumenta e potencial di participantenan y tambe fortalece e union, of ‘link’, entre individuonan cu e proyecto aki, ‘Learning Links’ por considera exitoso den futuro, ta p’esey cu Flores a señala cu pueblo ta keda invita pa registra pa e proyecto aki pa asina hunto descubri talento y habilidadnan nobo.

CBLH kier recorda pueblo di Aruba tocante su otro actividadnan na San Nicolas, entre otro ‘Scol di Percusion di CBLH’ cu Sr. Vio Wester y grupo ‘Forever Young’ pa adulto mayor y ademas lo sigui brinda comunidad su servicio di facilidad pa reunion y celebracion.

Recientemente a inicia colaboracion cu 2 artista cu ta Sra. Indra Stamper y Sra. Tracy Halman ken ta bay cuminsa lesnan di cosemento pa hoben y tambe les di Foam-Art pa adulto mayor, Tipico ‘Grupo Tramus’ tambe a uni forsa cu CBLH y tur fin di luna ta bay toca durante e fiesta di bario, Asociacion ‘Aruba Flight Simulator Club’ recientemente tambe a cera acuerdo cu CBLH y ta bay organisa su famoso exposicion pa tur amante di aviacion durante luna di september na CBLH.

Pandemia di Covid-19 a afecta e aspectonan social cu a bay atras y den esaki CBLH ta activa back y ta pone enfasis riba aspecto social recreativo y tambe pa nan por sigui crece como hendenan y tambe como nacion, den programanan aki tin algun di nan cu ta enfoca riba e parti motorico di muchanan y di adulto mayor unda nan kier pa tur interesa bay tuma e tayernan aki pa siña algo sino tambe pa socialisa, algo cu ta hopi importante segun Flores a bisa.

E costo pa participa den actividadnan ta entre 5 pa 15 florin pa luna, dependiendo di e tayer.

E obhetivo ta pa CBLH keda haci programanan manera esaki pa asina nan por haya fondonan tambe cu por contribui na mantencion di e Centro di Bario “pa hendenan di San Nicolas sinti cu nan tin un espacio unda nan por bin hunto y recrea di un manera sano pa nan sinti nan mes aprecia, balora y capaz.”

Igualmente Flores a gradici na tur esnan envolvi den e proyecto aki, en particular CEDE Aruba y ‘Samenwerkende Fondsen Cariben’ pa nan sosten inmenso, mas cu claro CBLH ta extende un invitacion grandi na tur instancia cu ainda kier yuda aporta na nan proyecto y tambe tur boluntario eyfo.

Por ultimo, ta invita grandi y chikito pa ‘Like & Follow’ gusta y sigui CBLH riba Facebook, Instagram y Tiktok p’asina semper keda al tanto di tur actividad cu nan ta brinda comunidad cu hopi amor y dedicacion.