(AP) – Centers for Disease Control and Prevention Mericano a cambia nan curso riba diaranson riba algun guia pa cu e bistimento di tapaboca, recomendando cu te hasta e personanan cu ya ta vacuna bolbe bisti tapaboca den areanan cera den cierto parti di Merca, unda cu e variante Delta di coronavirus ta causando aumento den casonan atrobe.
Citando informacion nobodo tocante e variante su habilidad di plama entre personanan vacuna, e Centers for Disease Control and Prevention a recomenda uso di tapaboca den espacionan cera pa tur maestro, trahado, studiante y bishita na scolnan den henter e nacion, no importando e status di e vacuna den e persona aki.
Den otro desaroyonan, President Joe Biden a bisa su administracion cu e tabata considerando pa rekeri tur trahado federal pa ricibi nan vacuna. Su comentarionan a bini un dia despues cu e Department of Veterans Affairs a bira e prome agencia federal cu a tuma e decision di rekeri e vacuna den tur su trahadonan di cuido di salud.
E guianan nobo tocante e uso di tapaboca ta bini despues di decisionnan recien den Los Angeles y St. Louis pa bolbe back na e mandatonan tocante e uso di tapaboca paden, mirando un aumento den casonan y hospitalisacionnan cu ta specialmente critico den e parti Sur di e nacion. E pais ta mirando un averahe di mas di 57,000 caso pa dia, y 24,000 hospitalisacion di COVID-19.
E guia riba uso di tapaboca den espacio publico paden ta aplica pa cierto parti di e pais cu por lo menos 50 caso nobo pa dia pa cada 100,000 persona den e ultimo siman. Esaki ta inclui casi 60% di e lugarnan den Merca segun oficialnan.
Mayoria di e infeccionnan nobo den Merca ta sigui den e personanan cu te ainda no ta vacuna. E casonan yama ‘breakthrough infections’ generalmente ta causa un enfermedad mas leve, y por pasa den persona cu ta vacuna. Den comienso di e brote di e variante aki, e personanan infecta cu ya tabata vacuna tabatin nivelnan hopi mas abao di e virus, y a ser declara tiki probabel di por plama e virus mesun efectivamente cu e personanan cu no ta vacuna, segun director di Centers for Disease Control and Prevention Dr. Rochelle Walensky a bisa.
Pero cu e variante delta, e nivel di virus den e personanan vacuna infecta “no por ser diferencia” di e nivel di virus den e nanishi y garganta di e personanan cu no ta vacuna Walensky a agrega.
Personanan vacuna “tin e potencial di plama y infecta otronan cu e virus aki” Walensky a comenta.
Pa mayoria di e pandemia, e Centers for Disease Control and Prevention a conseha Mericanonan pa bisti nan tapacoba pafo di nan tabata den menos di 6 pia di distancia for di otro.
Despues den april, den bista cu e nivelnan di vacunacion a aumenta grandemente, e agencia a relaha e guianan y a bisa cu e Mericanonan cu ta completamente vacuna, no mester haci uso di e tapaboca sea paden of pafo, al menos cu nan tabata den un espacio hopi aglomera. Den mei, e guianan aki a relaha hopi mas pa personanan cu ya ta vacuna, dunando permiso pa stop di bisti e tapaboca den practicamente tur situacion.
E guia te ainda ta pidi pa e personanan sea vacuna of no, sigui bisti e tapaboca den lugarnan grandemente aglomera manera den bus, avion, hospital, prizon, casnan pa personanan sin cas, pero lagando liber e negoshinan cu ta habiendo back y algun otro luganan.
Consecuentemente, e Centers for Disease Control and Prevention a bisa cu personanan completamente vacuna no mster bisti tapaboca na scolnan mas tampoco.
Pa lunanan largo casonan di COVID, mortonan y hospitalisacionnan a keda baha constantemente, pero esaki a cuminsa cambia na comienso di vakantie y cu e variante delta desaroyando y birando un version hopi mas transmisibel di e virus, causando cu e variante aki a cuminsa plama y a causa un brote atrobe den areanan unda cu e vacunacion tabata hopi abao.
E secretaria di prensa Jen Psaki di e Cas Blanco a expresa cu e variante delta a cambia e nacion su bista di COVID-19 desde cu e Centers for Disease Control and Prevention a relaha e reglanan pa cu e bistimento di tapaboca.
“Esaki ta nan trabao. Nan trabao ta pa revisa y wak informacion cu ta keda cambia, datonan cu ta sigui desaroya, un pandemia historico cu te ainda ta desaroyando y asina por provee guia na e pueblo Mericano,” Psaki a conta.
“Loke no a cambia,” Jen a agrega, “ta e hecho cu e personanan cu ta vacuna tin un gran proteccion di enfermedad serio, proteccion di hospitalisacion y proteccion di morto.”
Algun expertonan di salud publico a bisa cu anteriormente nan a pensa cu e Centers for Disease Control and Prevention a tuma nan decision basa riba bon ciencia. Pero e expertonan aki tambe tabata hopi critico, notando cu no tabatin un sistema unda cu Mericanonan por a documenta nan status di vacuna, cual a crea un sistema di honor. Personanan cu no ta vacuna a mira esaki manera un oportunidad pa no bisti nan tapaboca y haci loke nan kier.
“Si tur e personanan no vacuna tabata responsabel y a bisti tapaboca den luganan cera of paden, nos no lo a mira e brote aki” Dr. Ali Klan, un ex investigado di Centers for Disease Control and Prevention a bisa, ken aworaki ta cabesante di University of Nebraska’s College of Public Health.
Lawrence Gostin, un profesor di ley di salud publico na Georgetown University a yega na un conclusion similar.
“E tabata di premira cu na momento cu Centers for Disease Control and Prevention a haci e anuncio, cu e uso di tapaboca no lo ta e normalidad mas, y esey ta exactamente loke a pasa.” Gostin a expresa.
E Centers for Disease Control and Prevention por ser mira como “cambiando cada biaha di aki, aya” Gostin a agrega, pa motibo cu no tin ningun cambio publico conoci den e ciencia. Ademas, e no ta probabel cu e lo cambia e comportamento di e personanan cu mas mester bisti e tapaboca.
“Mi no ta kere cu bo por yega na esaki back efectivamente,” Gostin a comenta.
