Trahadonan di salud na Iran tin un solo peticion: Stop di bebe alcohol industrial pa combati coronavirus. Medionan Irani a reporta cu casi 300 persona a fayece y mas di mil a bira malo te awo door di bebe methanol na e Republica Islamico, unda bebidanan alcoholico ta prohibi.
Un dokter Irani yudando ministerio di Salud di e pais a bisa AP ayera cu e problema ta mas grandi ainda, dunando un cifra di 480 morto cu 2,850 enfermo.
E venenamento a yega mientras curanan falso ta plama riba rednan social na Iran, unda hende ta keda produnfamente sospechoso di gobierno despues cu a minimisa e crisis pa varios dia prome cu esaki a abruma e pais.
“Otro paisnan tin un problema so, cual ta e pandemia di novel coronavirus. Pero nos tin dos”, segun Dr. Hossein Hassanian, consehero na Ministerio di Salud Irani kende a duna e cifranan na AP. “Nos mester cura hende venena pa alcohol y tambe combati coronavirus.”
Te awo, no tin un cura conoci pa COVID-19, e malesa causa pa e virus. Cientificonan y dokternan ta sigui studia e virus den busca remedi efectivo y un vacuna.
Pero riba mensahenan comparti riba rednan social, cuentanan Irani na Farsi falsamente a sugeri cu un maestro di scol Britanico y otronan a cura nan mes di coronavirus cu whiskey y honing, basa riba un storia di tabloide na februari. Mescla cu mensahenan tocante uso di sanitizer basa riba alcohol, algun eroneamente a kere cu bebe alcohol industrial lo mata e virus den nan curpa.
E Republica Islamico a reporta mas di 29mil caso confirma y mas di 2,200 morto di e virus, e cantidad mas grandi di cualkier pais den Medio Oriente. Expertonan internacional tambe ta teme cu Iran por ta reportando menos caso, como cu oficialnan pa varios dia a minimisa e virus prome cu eleccion parlamentario.
Na Iran, gobierno ta manda cu fabricantenan di methanol toxico pone un color artificial na nan producto pa asina publico por diferencia esaki di ethanol, e sorto di alcohol cu por usa pa haci herida limpi. Ethanol tambe ta e sorto di alcohol haya den bebida alcoholico, maske su produccion ta ilegal na Iran.
Hassanian a bisa cu desafortunadamente na algun provincia, incluyendo Khuzekstan y Fars, e cantidad di morto pa bebe methanol ta mas halto cu di coronavirus.
The Associated Press Health and Science Department receives support from the Howard Hughes Medical Institute’s Department of Science Education. The AP is solely responsible for all content.
