Centenares di Hondureño a topa un biaha mas na San Pedro Sula, na nort di e pais y un di e zonanan mas destrui pa ultimo horcannan, pa cuminsa cana cu e intencion di forma un caravana y purba di yega na Merca.
Nan ultimo intento den grupo tabata na october, pero e caravana a wordo disolvi pa forsa di seguridad Guatemalteco. Desde e momento ey e pobresa, violencia y efectonan di pandemia a uni horcannan Eta y Iota, cu segun organisacionnan internacional, a afecta mas di cuatro miyon di centro Americano, tres miyon di nan Hondureño.
Hopi cara tabata refleha desesperacion. “Akinan nos ta bay solamente cu loke horcan a laga pa nos” Edgardo Calderon, di Lima na departamento di Cortes a comenta y tambe a agrega cu despues cu el a perde tur cos el a dicidi di bay cu parti di su famia y aventura “pa wak kico lo pasa”. E destino di tur di nan ta Merca.
Eynan ta na unda haci menos di un siman e presidente di Honduras, Juan Orlando Hernandez, y su canciyer Lisandro Rosales a biaha cu e fin di pidi ayudo pa enfrenta e efectonan cu horcannan a causa.
Un di e region mas afecta tabata Valle del Sula, un zona industrial y agricola na unda ta produci casi 45% di entrada di e pais. El Valle a haya un perdida masivo di cultivo, loke a haci cu varios organisacionnan no gubernamental a cuminsa haya un escasez di cuminda. Y ora cu hopi compania a wordo afecta, tambe ta espera di un cantidad di hende cu por keda sin trabou.
Desde final di november gruponan chikito di menos di un dozijn di persona a cuminsa sali for di e pais pero hopi di e miles cu tabata den refugio ya caba a adelanta nan intencion di uni pa e caravana na momento cu lo wordo forma.
