Centenares di hende a acudi na evento di partido; Mike Eman: “Partido AVP a nace di un causa comun y cada generacion di partido ta sinti e yamada di sentimento cu ta core manera un liña ‘berde’ di un generacion pa otro”

Lider di partido AVP Mike a tira un bunita discurso diadomingo ultimo. El a reconoce cu cada un di e politiconan di AVP ta comparti e motibo di nan presencia den e sala cu tabata yen yen. “E motibo ta pasobra pueblo ta pasando momentonan sumamente dificil. Nos pueblo ta sufriendo. Tin un pobresa creciente den nos pais. Tin duda den e stabilidad di nos pais.

Diabierna ultimo Hulanda a expresa di no tin confiansa den e actual gobierno. Institutonan importante den e pais aki ta den conflicto cu gobierno, gremionan cu ta representa empleadonan publico ta exigiendo indexering pasobra cu e poder di compra a bay atras den e ultimo dos añanan cu mas di 10%. Comercio ta den conflicto cu gobierno pasobra kier sconde BBO den e prijs pa asina bo no por mira e medidanan cu ta wordo impone riba pueblo causando un decadencia y deterioro den nos economia. Esunnan den enseñansa ta sumamente preocupa cu e direccion robes y con cosnan ta bayendo. Tur dia gobierno tin conflicto cu un scol na Aruba.”

Eman a bisa cu ora bo pais ta den crisis, ora pueblo ta sclama pa cambio di direccion, ora pueblo kier protectornan y defensornan, anto e ora e momento di AVP a bolbe yega. “Un causa comun, ta e tema di e evento aki. Hopi partido tin den historia di Aruba, pero tin un solo partido cu no a nace a base di division, a base di kiebro di otro partido politico, discusion cu otro, pero cu nace y brota for di alma y curason di e pueblo aki . Esey ta Partido di Pueblo Arubano AVP. AVP a nace a base di un sentimento, un causa comun y cada generacion di e partido aki a sinti e yamada ey. Esey ta e liña ‘berde’ cu ta core di un generacion pa otro. Cu algo ta yama nos cu nos ta sinti cu nos responsabilidad ta transcendental y profundo y cu nos ta yama na momentonan cu nos pueblo tin mas inkietud, tin mas dolor y mas incertidumbre. Partido AVP ta wordo yama e ora ey pa trece un luz den e scuridad, pa saca un man pa esunnan cu mester di proteccion. Partido AVP ta esun yama e ora ey pa lanta para y bisa cu ta basta cu abuso. Habri porta pa e pueblo por cana y duna tur hende un oportunidad husto na cada generacion di e pais aki pa por desaroya su mes y no carga cu cosnan inhusto. Nos ta yama atrobe pa sirbi un causa comun.”

“Partido AVP no por permiti cu e pueblo ta sigui empobrece. Nos no por permiti cu nos ta bay haya ripiticion di historia cu scolnan ta cera, universidad ta cera, educacion di maestronan ta wordo kibra. Nos no por permiti cu inhusticia ta sigui prevalece den e pais aki. Partido AVP lo asumi su responsabilidad como e defensor nacional di tur cu ta biba riba e pais aki. E causa comun aki ta brota den nos curason como dirigentenan di partido, pero e ta brota tambe den curason di tur nos activistanan, miembronan y votadonan.”

Bou aplauso grandi Mike Eman a bisa e audiencia cu nan ta e bos di partido AVP. “Boso ta e bos, e curason y alma di e partido aki. Mi tin un peticion na boso, mescos cu boso a haci un peticion na mi un aña pasa. ‘Ban traha di dia y anochi pa libra e pais aki di e gobierno aki y trece bek felicidad den cada hogar. No pa mi ni pa e candidatonan, pero pa Aruba y e pueblo. Ban traha!! Ban traha duro, Aruba mester di nos!