Censo ta duna clarificacion riba situacion di paspoort falso

Den nos anterior edicion, Bon Dia Aruba a trece dilanti un incidente cu a tuma luga na oficina di Censo diamars ultimo na unda un persona cu tabatin un paspoort falso a keda deteni.

Pa cu esaki, manera Bon Dia Aruba a indica, autoridadnan pertinente como Polis y Censo no a duna na BDA un clarificacion riba e hecho aki, cu por a trece cierto inkietud den comunidad, mirando cu Aruba ta den un temporada di eleccion y riba rednan social a bin dilanti cierto comentarionan pa cu esaki. E suceso tabata trata di un señora cu segun reportenan, a wordo deteni na Censo na momento cu el a purba di presenta un paspoort falso.

Sharine Luidens, director di Censo a tuma contacto cu BDA e dia di ayera pa trece dilanti informacion y indica cu e situacion a haya un atencion cu no tabatin mester. Di loke a sucede e dia en cuestion, Luidens a señala cu tabata trata di un paspoort Dominicano. Ademas di esey el a sigura cu “e personal ta getrain pa capta e iregularidad nan aki y ta normale procedure cu nos ta yama polis pa nan sigui verder”.

Di igual forma, a enfatisa cu e suceso no ta nada relacion cu eleccion na Aruba, cual ta programa pa tuma luga dia 25 di juni proximo. “E no tin niks te maken cu eleccion. Ban pone si tabata trata di un paspoort Hulandes mes, cu ta practicamente imposibel, bo no por haci nada cune pasobra p’esey tin un kiezersregister na cada urna.”