Censo no ta gelink completo cu sistemanan di otro departamentonan manera Inmigracion y Dimas. Si un persona ta bay afo y keda seis luna of hasta un aña, Censo no sa esey. Pero e situacion aki ta bay cambia via un proyecto cu lo bin cu ta yama “Key To Data Distribute Automatic”.
Directora di Censo, Sra. Sharin Luydens a splica cu e ta un sistema modelo cu ta bay link entre otro cu IASA y diferente departamento, caminda nan ta distribui dato relaciona cu e registracion di personanan cu ta biba mas afo cu na Aruba mes.
E interaccion di informacion aki lo haci cu pa ehempel un persona ta kita su nomber for di registracion di Censo, pasobra e ta bay biba temporalmente pa un periodo largo of pa semper afo, otro departamentonan hasta AZV y SVb lo haya e informacion ey den tempo real.
Den e caso aki, si un persona ta kita su nomber for di Censo, unabes cu e ta hacie, ya caba AZV tin e informacion aki. Esaki ta haci cu e posibilidad cu e persona aki lo sigui haci uzo di e servicionan medico cu nos seguro medico general ta ofrece, no ta posibel mas.
E sistema aki lo permiti un miho control, ya cu e ta afectando e fondonan di instancia manera AZV, ya cu tin hendenan cu ta abusa di dje. Ta e caso di hendenan cu ta bay biba afo y nunca a retira nan nomber for di Censo, y ora cu nan ta bira malo nan ta bin Aruba bek pa probecha di e servicionan medico cu AZV ta ofrece. “Esey mester pasa pa historia cu un sistema cu ta yama Key To Data Distributie Automatic”, directora di Censo a bisa.
El a bisa cu si e persona ta bay mas cu un aña afo, e sistema automatisa aki lo reconoce si e persona ainda inscribi na Censo tin mas cu un aña afo. E dato aki ta wordo manda automatico pa e departamentonan concerni. E proyecto aki cu nan ta bay desaroya cu e compania CORE (Continuity Is Our Business) di Corsou cu a gana e destaho publico ta wordo subsidia pa medio di Fondo Desaroyo Aruba (FDA) den e proximo lunanan.
Caso di fayecimento
Den caso cu un persona a fayece na Aruba of afo e mester wordo saca for di registro di Censo. Na Aruba e situacion aki no tin problema, ya cu e famia di e fayecido ta bin Censo pa haci esaki. Nan por haya un acta di fayecimento pa realisa diferente diligencia entre nan ceramento di cuenta di banco relaciona cu nan ser keri cu a bay laga nan. Esaki ta un proceso cu normalmente e cas funerario mes ta realisa na Censo.
Pero tin hendenan registra na Censo cu a bay biba afo, y no a saca nan nomber for di registro di Censo pa motibo diferente, y te hasta nan ta fayece afo. Directora di Censo a bisa cu ta deber di e familiar pa informa Censo cu e persona a fayece. Pero finalmente tabata deber di e ciudadano mes cu prome cu el a bay biba afo pa informa Censo di e decision aki.
