Entrante 18 di juli 2016 CENSO por duna servicio di Cedula atrobe. Y esey ta bay ta hopi mas facil cu antes. E Cedula ta wordo produci na Aruba mes y lo wordo duna mes ora na e cliente.
Proceduranan nobo
CENSO a hinca hopi esfuerso y tempo den e descripcion di e proceduranan nobo pa cu e produccion di e Cedula. Siguridad, servicio y rapidez ta palabranan esencial den henter e procedura. E Cedula aki lo wordo produci na Aruba mes y ta cumpli cu tur e rekisitonan internacional di siguridad. Tambe e proceso di peticion y otorgamento di Cedula lo ta hopi mas simpel y lihe; pa e Cedula nobo bo persona lo tin cu acudi na CENSO un biaha so. E Cedula lo keda cla mientras bo ta warda riba dje.
Kico e procedura ta pa mi por haya mi Cedula?
E ta hopi facil pa haci un peticion pa un Cedula:
1) haci un cita via www.censo.aw
2) durante e cita, CENSO lo saca un potret di bo y e firma lo ta digital
3) e Cedula ta wordo imprimi y por wordo uza di biaha
“Awor e cliente no mester bin dos biaha mas Censo, e por djis warda riba su cedula ”, segun Sharin Luydens, hefe di CENSO. ”Y esey ta un diferencia grandi cu antes” e ta remarca. “Den pasado e tabata tuma mas o menos tres siman pa por produci e Cedula na Hulanda. Tambe e cliente mester a bin CENSO dos biaha: un biaha pa pidi e cedula, y otro biaha pa bin busc’e. Awor bo ta keda cla den un bishita”, Sharin ta añadi.
Sharin ta reconoce cu tin un retraso den e produccion di Cedula. “Durante full e periodo cu e sistema nobo a wordo desaroya, Cedula no por a wordo produci.” Sharin ta splica. “Pero cu e sistema nobo nos ta spera cu e retraso aki pronto lo wordo resolvi.
”Desde 1 juli diferente testnan a wordo haci pa asina garantisa cu e produccion di ID lo bay bon. Esaki lo wordo sigui door di un ‘soft launch’ y nos lo ta cla pa e trabao grandi mes” segun Sharin.
Bo persona kier pidi un Cedula nobo? Haci un cita via www.censo.aw . Prijs di Cedula ta Afl 40,-. Pa mas informacion, subi www.censo.aw
