E ex-polis envolvi den e delito di falsificacion di documentonan y cu actualmente ta den man di su ex-coleganan ta un persona conoci na Censo pa e mesun tipo di delito aki.
Pero no solamente e persona aki di fam G., sino otro hendenan cu a purba of a falsifica documento produci pa Censo, y Ministerio Publico (OM) a wordo poni na altura oficialmente di nan, pero te awor e instancia aki no a reacciona ni haci nada.
Directora di Censo, Sra. Sharin Luydens a revela cu for di cu el a asumi e funcion aki 7 aña pasa, e tin entre 75 pa 100 denuncia of keho duna na Ministerio Publico. E no sa si algo a wordo haci cu nan. Entre nan un contra G. kende finalmente a keda deteni.
Nan tabata dos caso di falsificacion relaciona cu Sr. Gibbs particularmente cu e papel di 5 florin. E persona aki a wordo deteni den pasado pa e mesun delito y despues el a bay liber. Directora di Censo a bisa cu G. no a falsifica su firma. Pero si el a yega di falsifica papelnan di diferente instancia hopi grandi. “Mi ta kere cu esaki ta algo condenabel y cu mester actua fuerte contra dje”.
Censo, falsificacion y OM
El a indica cu no ta e prome papel di 5 florin cu hendenan a purba di falsifica, pero nan a yega di gara nan den nan maniobra. Tambe tin casonan relaciona cu actanan cu a wordo trece falso cerca nan di Censo.
Sra. Luydens a trece un ehempel di un señora cu a trece e actanan di nacemento di su cuater yiu, y nan tur a nace un luna for di otro. “Imposibel! E ta un acta falso”, el a bisa categoricamente. P’esey mes e ta haya hopi importante pa diferente departamento di Gobierno por ta gelink na otro.
El a bisa cu nan a yega di traha e denuncia aki legalmente y nan a entrega nan na OM; y nada ta wordo haci. “Nos ta duna practicamente e caso cla na Openbaar Ministerie; pero Openbaar Ministerie y polis tin cu sigui cu e casonan aki”, el a declara ayera.
Directora di Censo a agrega cu te ainda nan por yega, ya cu nan no por haci nada mas cu e casonan aki. E ta reconoce cu e situacion aki di negligencia ta afecta nan trabou. Ya cu nan ta duna un keho, pero nan no por persigui penalmente e persona pasobra esey no ta nan tarea.
