Ayera mainta Central Bureau Statistic Aruba (CBS) a haci un conferencia di prensa pa anuncia oficialmente e aña di Censo, den cual ta haci un conteo di poblacion y vivienda manera cada 10 aña, pa conta tur esunnan cu ta biba na Aruba.

Communications officer Damara Rasmijn a splica ayera cu e proposito di esaki ta pa contesta tres pregunta cardinal, cual ta: cu ken nos ta? Cuanto nos ta? Con nos ta biba?

Tambe el a menciona cu e aña aki nan lo cuminsa implementa e metanan di desaroyo sostenibel (SDG’s). Di esaki, Rasmijn a declara cu CBS ta duna su aporte pa motibo cu un censo ta wordo usa como instrumento principal tambe pa colecta data, cu ta encera calculacion di indicadornan di SDG’s.

Rasmijn a comenta cu diferente pregunta ta wordo haci pa por haya contestanan riba e metanan aki, cu tin di haci cu educacion of economia, por ehempel. Esey nan ta hinca den cuestionario di censo y asina e grupo di SDG’s tambe por haya informacion pa por calcula con e indicadornan aki ta na Aruba.

Manera a keda conoci varios luna pasa, censo lo tuma luga di 1 pa 10 di october di e aña aki. Tin aproximadamente 47.000 punto di adres cu nan teller of encuestadonan lo bay bishita. Di esaki Rasmijn a expresa cu nan a haci un trabou continuo aña pasa di cas pa cas, pa wak cuanto adres tin compara cu 10 aña pasa, pa asina tin un idea di cuanto hogar nan mester acerca.

Pa luna di april y mei, Rasmijn a informa cu lo haci e mesun trabou, pa motibo cu den comparacion cu juli di aña pasa, ta visibel caba cu tin hopi cas cu a bin extra tambe.

Den preparacion di e censo, Rasmijn a expresa cu nan a acerca pa varios compania pa loke ta trata e parti di mercadeo, pa asina nan por informa comunidad di un miho manera posibel riba e importancia riba Censo 2020. Asina tambe pa duna informacion riba topiconan cu por haya den cuestionario.

Tocante e proyecto piloto cu nan a haci na luna di october di aña pasa, un di e puntonan cu a bin dilanti ta cu hogarnan lo prefera tin un lista di informacion pa nan por prepara prome cu e teller yega na nan cas. “Esaki lo haci cu entrevista cu e teller ta bay mas lihe tambe”, el a afirma.

Den comparacion cu aña 2010, nan ta bay tin solamente cinco tell center den e censo aki, pa motibo cu Aruba ta wordo parti den cinco pida, San Nicolas, Santa Cruz, Paradera, Oranjestad y Noord. E biaha aki nan ta buscando un localidad central unda lo bay tin personal di CBS durante full e censo y tambe ekipo di encuestadonan. Ademas si ciudadanonan tin algun pregunta y kier algun splicacion, tambe por yega na e tell center aki. Edificio di CBS di Sun Plaza lo keda como esun central.

Na e momentonan aki, CBS ta buscando e cantidad di 1.000 encuestado y 200 encuestado di reserva. Rasmijn a comenta cu e plan pa nan lo cuminsa ta desde juni y juli El a haci un yamado pa tur hende cu kier aplica pa bira un encuestado subi riba e website di CBS y yena e formulario.

E rekisitonan cu mester tin pa aplica pa esaki ta cu e persona mester maneha un tablet, lesa, skirbi y papia papiamento, Ingles, Hulandes y Spaño. Apart mester tin un diploma di Mavo, ta residente di Aruba, un rijbewijs valido y un medio di transporte, pa motibo cu den 10 dia cada encuestado mester bishita 40 adres.

Rasmijn a bisa cu encuestadonan ta bay haya tres training, cu lo cuminsa na augustus cu un duracion di cinco siman y ta di caracter obligatorio. Esaki pa motibo cu si un di nan no haci algun di e tres, no por subi riba caya. Ademas mester ta disponibel den henter proceso di censo.

El a menciona cu lo cuminsa publica e resultadonan preliminar di censo 2020 na fin di october y pa maart 2021 tambe lo publica e resultadonan definitivo.

Pa finalisa, el a trece dilanti cu e entrevista cu encuestadonan lo haci pa cada adres lo tin un duracion di 30 minuut aproximadamente, depende di e tipo di persona. Por ehempel si ta un persona pensionado lo haya menos pregunta, pa motibo cu parti di labor ta cay afo.