Censo 2020 lo sigui te dia 30 di november online y cu bishita cas pa cas

Ayera Central Bureau Statistiek (CBS) Aruba a ofrece un ultimo desaroyo di loke ta trata Censo di aña 2020, na unda a wordo treci dilanti cu nan lo extende e conteo te 30 di november cu formulario online y bishitanan di cas pa cas.

Desiree Helder, director interno di CBS, a expresa cu dos siman atras, tempo cu nan a caba cu bishitanan di cas pa cas. Igualmente el a informa cu den e dos simannan aki nan a bishita 21.000 adres cu un ekipo conforma di aproximadamente 250 persona, cu a conta 25% di e poblacion ademas di loke a wordo conta cu e proceso via online.

“Nos a haya un bon cooperacion di pueblo, pero algun di cas no a wordo conta ainda. E meta ta pa nos finalisa esaki dia 30 di november, pa asina nos por tin 100% di e poblacion conta”, Helder a sigura.

Pa motibo cu te ainda ta falta 50% di e poblacion pa conta y a base di peticion cu nan a haya for di diferente persona, nan a dicidi pa habri e formulario di Censo online atrobe for di diabierna awor te dia 30 di november, pa asina personanan por scoge tambe e opcion di haci e proceso via nan website www.census2020.aw.

Di esaki, Helder a recorda cu e formulario via online ta un proceso hopi cortico cu por tin un duracion di dies minuut.

E motibo di pakico e proceso e biaha aki a bay un tiki slow, Helder a conta cu nan tin un ekipo chikito na e momentonan aki, cu nan tin mas control y cu Covid-19 tambe a afecta e proceso. “Si tin hende cu a coopera, pero tambe tin hende cu nos no por haya na nan cas.”

Tambe el a sigura cu nan tin un plan y cu si pa fin di november nan no ta yega conta tur adres, kisas nan por extende e proceso un siman mas te december, si ta necesario te luna di januari, pero esey ta depende di con e proceso ta bay e luna aki.

Te na e momentonan aki, Helder a menciona cu nan ta hayando loke ta e base mas comun, por ehemplo, personanan cu a nace na Aruba, personanan cu ta casa, porcentahe di esunnan cu ta bayendo scol y cu esaki nan por a mustra cu di berdad e conteo ta bayendo bon. “Cu e contestanan ta manera mester ta”, el a afirma.

Pa comienso di otro nan lo cuminsa haci e ehercicio di analisa e data y compara e datonan aki cu otro añanan pasa pa asina nan por tin un miho indicacion si e informacion cu nan tin ta completo.