Ayera tardi Aeropuerto Internacional Reina Beatrix a ricibi e vuelo inaugural entre Fort Lauderdale y Aruba di JetBlue. E ruta aki ta bira e di tres cu JetBlue ta ofrece cu ta non-stop pa Aruba. Bon Dia Aruba a ricibi e siguiente relato tocante e vuelo inaugural aki.
Durante un ceremonia oficial diaranson ultimo den presencia di minister di Economia y Comunicacion Richard Arends, director di planificacion di ruta di JetBlue John Checketts, director di Aruba Tourism Authority Ronella Tjin Asjoe-Croes, director di Aruba Airport Authority James Fazio, y director di AHATA Jim Hepple, a yama bonbini na JetBlue su vuelo inaugural cu servicio entre Fort Lauderdale-Hollywood International Airport y Aruba su Aeropuerto Internacional Reina Beatrix.
Cu vuelonan diario entre sur di Florida y Aruba, e ruta nobo lo sirbi como hub importante pa ricibi mas bishitante for di e.o. e region west di Merca,cual operacion a inicia dia 4 di januari, 2017.
Pa conmemora e vuelo inaugural aki, Aruba conhuntamente cu JetBlue a treat e bishitantenan di e vuelo riba un dia yena cu festividad y regalonan, unda a decora e punto di salida na Fort Lauderdale cu decoracionnan festivo di Aruba.
Ta habri ruta nobo pa bay west Merca
For di dia 29 di augustus di 2016 benta di pasashinan pa cu e ruta nobo aki a inicia. Esaki ta e di tres ruta non-stop pa Aruba di JetBlue cu ta inspira confiansa,elevando e cantidad y calidad di pasaheronan procedente di Merca. Mester delinea cu e proximidad beneficioso entre Fort Lauderdale y Aruba, JetBlue awo por ofrece su clientela un liña di producto innovativo y atractivo. Ehempel di esaki ta entre otro‘Weekend Get-Aways’ y paketenan asina yama ‘Caribbean Escapes’.
“Aruba su partnership cu JetBlue lo continua na eleva nos turismo na nivelnan nobo. E aerolinea aki su servicio diario di Fort Lauderdale, lo sirbi como hub importante pa ricibi mas bishitante for di entre otro e region west di Merca manera San Francisco y Los Angeles, pero tambe di e parti Sur di Florida cu ta un area unda A.T.A. ta activando mas”, segun Ronella Tjin Asjoe-Croes, CEO di Aruba Tourism Authority.
El a sigui elabora cu tin como meta pa logra un crecemento di 5% for di e mercado di Merca pa aña 2017. E adicion di e hub di JetBlue aki ta cardinal pa por logra e crecemento aki y ATA kier sigura cu e aña ta cuminsa –y continua– na un manera fuerte, pa cual motibo a inverti den promocion adicional durante lunanan di november y december 2016. Ademas, ATA conhuntamente cu JetBlue a lansa un campaña promocional pa asina sigui promove e ruta nobo di Fort Lauderdale durante 2017.
Relacionnan solido cu resultadonan positivo
Directora Tjin Asjoe- Croes a comenta: “E ultimo 10 añanan e relacion entre Aruba y e compania aereo JetBlue a sa di conoce un evolucion positivo cu a contribui na un incremento di 12% di e mercado turistico Mericano durante e periodo aki. JetBlue a trece entre 20% pa 25% di e total di bishitantenan for di Merca pa Aruba durante e ultimo 5 añanan. Durante e prome dies lunanan di 2016,Aruba a conoce un crecemento di 6.7% di pasaheronan procedente di Merca biahando cu e aerolinea prestigioso aki.”
E di tercer ruta non-stop for di Merca pa Aruba di JetBlue ta proyecta pa contribui na un crecemento di 9.7% di capacidad asiento aereo durante temporada halto (e prome 3 lunanan di 2017).
Impacto economico
E introduccion di e vuelo diario aki ta ekivalente na un total di 54,300 asiento aereo pa aña 2017. Considerando un grado di ocupacion pa vuelo di averahe 85%, y considerando e patronchi di gasto(on-island spend) averahe pa un turista Mericano durante su estadia riba nos isla, e introduccion aki ta ekivalente na un impacto economico di rondo di 50 miyon florin pa 2017, asina e autoridadnan ta indica.
