Anualmente dia 1 di September ta un dia pa no solamente celebra prensa den Antias , sino tambe un dia pa refleha riba tur aspecto di un profesion cu na Aruba en special ta uno cu ta trece hopi desafionan pero cual ta seguramente un trabao hopi respetuoso y noble. Bon Dia tabata tin e placer pa sinta combersa cu diferente pioneronan entre otro den e mundo di prensa riba temanan cu ta bini hopi pa dilanti e temporadanan aki manera libertad di prensa na Aruba, como tambe kico ta e factornan di mas importante pa mantene na dje como un periodista y informante di pueblo.
E parti di evolucion digital di informacion a crea un impacto caminda cu e accesibilidad pa informacion ta na alcance di simplemente un ”click”, y tambe e fuente di informacion a bira mucho mas habri awendia den comparacion cu 20 aña atras. Sin duda, tin biaha segun periodista Sr. Benjamin Romero, algo cu e no por compronde pakico ta ora cu por ehempel tin un suceso, e parti di restriccion di informacion inmediatamente ta dificil. Ta compronde cu naturalmente ora cu ta sucede un caso, ta demanda un cierto investigacion y mester duna su espacio, sin embargo, esaki Sr. Romero ta bisa cu mester ta un espacio prudente pasobra nos ta un comunidad cu ta exigi informacion for di prensa cual mester ta veredicto y no speculacion.
Mientras cu informacion no ta bini for di un fuente oficial, speculacion ta wordo crea unda despues ta bin informacion oficial cu hopi biaha ta contradeci tur locual a wordo informa na prome instante. ”Esaki ta pa causa cu e fuentenan oficial cu mester informa oportunamente, tin biaha no ta haci e anto esaki sigur ta un desafio hopi grandi cu tin.” Sr. Romero ta bisa. Sr. Benjamin Romero a gradua na aña 1989 na Universidad di La Sabana na Bogota, Colombia como comunicado social y periodista anto e tin mas cu 24 aña eherciendo e trabao di prensa na Aruba.
”Como periodista bo ta un trahado social, caminda bo ta relaciona cu hende di tur nivel for di mas halto te cu mas baho y cu e posibilidad di papia nan idioma locual ta clave ora bo ta trece un informacion pa bo compronde bon cual e hende ta comunica cu bo. ” Sr. Romero ta bisa agregando cu locual e ta considera hopi cardinal ta e parti di capacidad pa nos gremionan periodistico. Trabao di prensa no ta facil, e ta un trabao cu ta demanda hopi sacrificio y e punto di capacitacion ta algo cu sigur ta importante den e mundo di prensa pa por brinda informacion debidamente na un pueblo.
Hopi operador di informacion, menos periodista
Un periodista mester tin un vision mas global y un conocemento mas grandi riba kico ta e impacto por ehempel di un noticia hasta si ta considera eticamente cu e noticia ey tin un impacto negativo pa e comunidad, por aplica auto censura segun Sr. Romero. ”E periodista ta bay un poco mas leu caminda tin e capacidad di analisis, evaluacion, cuestiona y considera eticamente un informacion tambe. Solamente a base di informacion, a base di capacitacion nos por hisa nos nivel di prensa na Aruba” Sr. Romero ta bisa. Sr. Tito Lacle di noticiacla.com, un periodista cu 25 aña di experiencia, ta splica Bon Dia cu ta importante pa haci bo trabao cu credibilidad. Sr. Lacle ta bisa cu ser un periodista ta mas cu cana rond cu un microfon y camara anto haci hende pregunta. ”Na Aruba e ta hopi facil pa bo bay den e profesion di periodismo, e no ta rekeri hopi biaha pa bo a studia esaki. Ami a cuminsa asina kemen mi no ta ningun hende pa reclama, sin embargo despues mi a bay profesionalisa mi mes y mi a siña con pa eherce e trabao apropiadamente.
Tin na Aruba cu no ta haci e trabao debidamente y sinembargo nan ta logra pasobra na Aruba hende no ta reconoce algo bon ora cu nan ta wak e, esey ta pone cu hopi biaha bo ta acepta cosnan cu no ta manera debe ser. ‘In het land der blinden, is een oog koning’. ” Sr. Lacle a bisa. Trabao di prensa no ta uno cu hende ta aprecia hopi biaha segun Sr. Lacle. Hopi biaha si bo haci bo trabao manera mester ta, bo ta haya hende ta rabia cu bo pasobra e ta negativo pa nan y bo ta wordo considera un mal periodista of un mal persona. ”Tin hopi desafionan pero e trabao ta asina diverso cu bo ta pasa algo totalmente diferente y e ta bale la pena na final di dia.” Sr. Lacle ta bisa.
Ambos banda di medaya ta conta, informacion mester ta completo
Sr. Hilario Doncker tin alrededor di 15 aña trahando den prensa y ta conta Bon Dia cu tur dos banda di medaya bo tin cu pasa pa hendenan por forma nan mesun opinion. ” Pa mi e ta importante pa mi haci preguntanan di mas imparcial cu ta posibel. Bo tin periodistanan cu ta faborece cierto partidonan politico cu den conferencia di prensa nan ta haci pregunta pa cual e contesta ta na fabor di e partido politico cu nan ta sostene como periodista. Ami no ta haya esey ta bon.” Sr. Doncker ta bisa. Bo mester pone bo mes den sapato di esnan cu bo kier informa, kende ta e pueblo, a base di esey bo ta haci bo preguntanan Sr. Doncker ta bisa. ”Mi ta kere cu en berdad nos ta biba den un comunidad chikito anto e contacto cu politiconan por ehempel ta mucho cerca, e distancia ta mucho cerca. E politiconan ta kere e ora cu nan por controla bo, p’esey nan por contesta bo cosnan manera ‘si pero bo sa e contesta caba pakico bo ta puntra mi’, nan ta haci esey pasobra nan ta sinti confiansa cu nos pero esaki no ta bon. Pueblo kier tende e contesta bini for di bo y no di mi. E mester keda profesional.” Sr. Doncker ta bisa.
Periodista Arien Rasmijn ta splica Bon Dia cu ta importante pa bo duna informacion mas completo y corecto cu ta posibel. ” Esey riba su mes no mester ta hopi dificil pasobra Aruba ta un isla chikito, tur hende conoce otro y e liñanan ta hopi cortico. E ta gewoon mas tanto cu e informacion cu bo haya mester ta veridico, al caso y neutral obviamente.” Sr. Rasmijn ta bisa. Compara cu otro paisnan, na Aruba libertad di prensa toch ta basta bon segun Sr. Rasmijn. Aki na Aruba, obviamente semper tin interesnan politico y esaki ta cosnan cu por perhudica un noticia gravemente. ”Esaki ta cosnan toch cu e periodista mes ta scoge pe anto e ta liber pa scoge p’esey. Den un situacion caminda tin libertad di prensa, bo por ta liber pa scoge pa esey, of bo por ta liber pa hustamente no haci esey.” Sr. Rasmijn ta bisa.
