“Ban concentra como pais riba locual ta uni nos,” esaki ta e mensahe cu minister Xiomara Maduro a expresa ayera como mandatario encarga cu cultura den cuadro di Dia Nacional di Himno y Bandera.
Pa alimenta e amor patriotico na nos futuro generacion, gobierno a manda traha un tas cu material educativo cu lo wordo reparti entre e muchanan di scolnan basico rond di nos isla. E tas ta inclui entre otro un banderin, folder ilustrativo cu informacion tocante celebracion di dia 18 di Maart.
E materialnan escolar aki ta skirbi na Papiamento. E ta haya esaki fundamental pa bo yuda bo yiunan pa nan expresa nan mes den nan lenga materno, ya cu esey tambe ta crea patria. Pero tambe siña nos generacion futuro kico ta nos historia y kico ta nos pais. Otro mandatarionan y parlamentarionan lo bishita e scolnan aki.
El a agrega cu union ta e forsa cu bo mester pa bo por progresa como nacion. Ya cu hopi cos nos a yega di logra como pais danki na e union di nos hendenan mes. Y mirando cu nos tin nos retonan como pais, e mandatario ta boga pa sigui fortalece y expresa e union aki den e celebracion nacional di dia 18 di Maart. “Ki momento ma miho! Sigur momento cu bo ta bay celebra dia di bo pais,” el a bisa.
Celebracion.
Pa duna contenido riba fecha 18 di maart, manera custumbra tin actividadnan organisa pa medio di e Comision Celebracion Dianan Nacional. Ya caba awe dia 6 di maart nos celebracion nacional ta cuminsa for di 6’or atardi cu e Festival Un Canto Pa Aruba su Himno y Bandera.
E ta un festival caminda participantenan di tur edad ta expresa su canto y composicion patriotico. El a bisa cu e festival aki cada bes ta yegando na un nivel mas halto. E mandatario ta premira cu e ta bira un bunita anochi na Plaza Betico Croes. E festival aki lo continua mañan. Pero tambe e categoria pa adulto ta tuma luga dia 11 y 12 di maart, y e lo finalisa dia 14 di maart den e mesun sitio emblematico aki.
Na bispo di nos dia nacional, dia 17 di maart tin un Manifestacion Cultural ariba Plaza Betico Croes, caminda tur hende lo disfruta di loke ta autoctono di nos, manera folklore, musica tipico, cuminda crioyo, etc.. E mandatario a cualifica esaki como ‘un rato pa nos ta hunto.”
Mientras riba dia 18 di maart mes, gobierno tin su acto protocolario, caminda gruponan uniforma lo desfila cu orguyo den nos dia nacional. Otro evento cu e mandatario a referi na dje ta Poeta di Patria. E ta haya cu den esaki tin hopi talento pa declama e amor patrio cu nan tin. Minister Maduro a formula un invitacion pa dia 13 di maart pa nos tur bini hunto na Fort Zoutman for di 6’or pa presencia e evento aki. El a gradici tur instancia envolvi cu ta haci posibel cu tur e actividadnan aki por tuma luga pa conmemora nos dia nacional di Himno y Bandera.
Minister Maduro a reitera su invitacion pa henter nos pueblo asisti na e diferente evento y actividad cu a wordo organisa pa celebra nos dia nacional. E ta haya cu como pais nos mester crea patria. “Patria bo ta crea tur dia cu e actonan cu abo como ciudadano ta haci pa bo pais,” el a bisa.
