Pa di 25 aña consecutivo, Centro di Pesca Hadicurari ta duna contenido na e celebracion di Dia di Piscado. Un dia masha special pa tur esunnan cu ta dedica na e actividad primario di piscamento riba nos isla. E biaha aki, den cuadro di nan tradicional torneo di piscamento, lo tuma luga un proceso di investigacion di dos sorto di pisca di nos region, pisca cora y wow’i boyo.

A base di dato compila pa nan mes y tambe pa departamento Agricultura, Cria y Pesca – conoci popularmente como Santa Rosa– su Seccion di Pesca ta calcula cu tin alrededor di 1500 piscado amateur, cu no tur ora ta sali bay pisca. Pero tambe 200 piscado regular, y tin un cantidad cu ta cay den un otro categoria, manera esunnan cu ta sali cu botonan di charter pa bay pisca.

Segun e biologo marino na servicio di e fundacion aki, Byron Boekhoudt, a declara cu esaki ta e di cinco lustro cu nan ta organisa nan torneo den cuadro di Dia di Piscado na e centro aki. Internacionalmente dia 29 di juni anualmente ta wordo declara Dia di Piscado pa Nacionnan Uni. Generalmente, e centro aki ta celebra e dia aki ya sea e diadomingo despues, y e biaha aki e ta cay diadomingo dia 30 di juni.

E aña aki nan kier a bin cu un celebracion mas grandi, pero e circunstancia actual a haci cu e lo ta un celebracion normal den cuadro di e celebracion di Dia di San Pedro, kende ta e santo venera pa e piscadonan den area di Caribe.

Celebracion, torneo y investigacion
Pa inicia nan celebracion, mañan diabierna dia 28 di juni, pa 8or di anochi, lo tin e reunion di capitan den nan Clubhuis unda lo tin inscripcion, lesamento di e reglanan y nan lo duna mas informacion tocante e torneo, y ademas lo tin un brindis chikito. E piscadonan cu ta inscribi ta haya nan T-shirt di siguridad, pechi y otro obhetonan. Nan ta premira cu e inscripcion lo ta ariba 26 boto y nan ta spera cu lo por kibra e record di aña pasa, cu tabata mas cu 30 boto.

Igualmente, Boekhoudt hunto cu e hoben Arubiano, Christian Romero, kende ta studiante di Biologia y Microbiologia di Universidad Los Andes di Bogota, lo duna un splicacion riba e investigacion cu e lo realisa pa su tesis di grado. E investigacion aki ta relaciona cu informacion genetico di piscanan di Aruba y nan familiaridad cu otro piscanan den nos region.

E torneo lo tuma luga diadomingo, caminda for di 12or di merdia te cu 4or di atardi e piscadonan lo cuminsa drenta den e pier di Hadicurari. Aunke for di 10or di mainta tur hende por disfruta di un ambiente familiar ,unda tin tent grandi, mesa y stoelnan cant’i lama, cu cushina cu ta ofrece diferente cuminda di lama crioyo y un bar bon surti ‘a la piscado y cu prijs a la piscado’, segun Boekhoudt.

Aunke pronostico di biento fuerte e torneo aki ta enfrenta esey, locual ta haci cu e torneo aki tin su desafio pa nos piscadonan. Tin diferente premio y reconocimento pa e participantenan. “Tin algo pa tur piscado,” el a bisa. E ta un torneo amplio, y durante e ultimo añanan ta bin creciendo danki na e apoyo di e piscadonan.

E diadomingo aki tur hende ta bon bini pa pasa un rato alegre y ameno cant’i lama na Hadicurari pa celebra Dia di Piscado den un ambiente familiar.