ORANJESTAD – Biblioteca Nacional Aruba (BNA) conhuntamente cu Departamento di Cultura Aruba (DCA) a duna contenido na e Dia Mundial di Buki y Derecho di Autor, riba diaranson 24 di april ultimo, cu un actividad titula: El Papiamento. E ta un fecha den e kalender di Unesco destina pa reconoce e trabou di e autornan y celebra literatura na henter mundo; y Aruba no tabata un excepcion.

Directora di BNA, Astrid Britten a indica cu e fecha aki a keda scogi debi cu e escritor famoso di Spaña, Miguel de Cervante kende ta autor di Don Quijote de la Mancha a fayece riba e fecha ey; y nan a dicidi di honr’e. Tambe esaki ta e fecha di fayecimento di autornan clasico manera, William Sheakespeare y Josep Pla.

El a laga sa cu mientras Inglatera y Irlanda ta celebra Dia Mundial di Buki riba un otro fecha, mas cu 100 pais rond mundo si ta celebra riba e fecha indica pa Unesco. Cada pais ta celebra e fecha aki na su manera, y akinan na Aruba nan ta bin conmemora e fecha aki cu un toke autentico cu ayudo di e gesto cultural, Mirto Laclé, pa cual sra. Britten a gradici’e. Tambe el a expresa palabra di danki na tur esunnan cu a contribui y participa pa e actividad aki por a bira un realidad.

Reconocimento
Cu presencia di minister di enseñansa, Rudy Lampe y director di DCA, Siegfried Dumfries a wordo presenta un programa multi disciplinario cu enfoke riba diferente disciplina cultural manera literatura y musica. El a bira un ocasion special unda a wordo duna un reconocimento na e canta-autor yiu di tera, Jossy Brokke den cuadro di su 60 aniversario den farandula.

E linguista y gestor cultural, Mirto Laclé a percura pa crea un ambiente agradabel pa e publico presente den un sala completamente yen na BNA por a disfruta di e anochi ey. En conexion cu e fecha aki, sr. Laclé a sostene un entrevista cu Sr. Ralph Yarzagaray kende 10 aña pasa a reedita e buki di Dr. Rodolfp Lenz : “El Papiamento. La lengua criolla de Curazao. La gramatica mas sencilla.” Dr. Lenz ta profesor hubila di Universidad de Chile. Un ehemplar di e buki aki a wordo otorga na Xiomara Frans-Muller di AMFEMA na Bonaire.

E actividad aki a conta cu actuacion entre otronan di Princilla Quandt kende a participa den festival Un Canto pa Himno y Bandera. Tambe cu e presentacion di e Grupo Melange bou direccion di Maybelline Arends-Croes celebrando su 50 aña den farandula.

Igualmente Sr. Frank William cu acompañamento di e guitarista Ronny Kock a canta su cancion “Abo,” cu el a yega di dedica su sra. Greta St. Jago, den cuadro di nan Boda di Oro. Tabatin musica di e Dj Caleto kende a bin realisando un trabou historico musical di Aruba.

Vivian Lampe kende ta yiu muhe di Padu del Caribe a toca dos cancion di su tata, esta Aurora y Potpourri Tumba cu acompañamento di e percusionista, Herbert “Ebby” Peterson.

E evento aki a clausura cu broche di oro, ya cu e musico Jossy Brokke a deleita e publico cu varios di su cancion inolvidabel manera Pais y Aruba, Amor Patrio, acompaña pa Camilo Muyale, Ebby Peterson, Doodle Sophia y Fay Luidens.

[maxgallery id=”38483″]