Riba 21 di maart ta celebra Dia Internacional di Poesia y den cuadro di celebracion aki, riba diaranson 23 di maart pa 6:30 di atardi na Biblioteca Nacional di Aruba lo tin presentacion di poesia, arte, musica y baile.

Sr. Mirto Lacle, conocido gestor cultural, linguista y literato a splica durante un rueda di prensa cu durante e anochi aki lo presenta tambe parti di e documentario di Rufo Wever, den cual un elenco di persona lo expresa nan opinion en cuanto ken Rufo Wever tabata na bida y ken lo e ta pa futuro, su herencia. E anochi aki tambe lo tin un elenco di personanan cu a participa den e competencia Poeta di Patria recientemente, entre nan e ganadora Marilis Bekker.

“Esaki ta e dia pa trece un encuentro entre poetanan y e anochi aki lo tin un traspaso di idea di concepto di poesia y arte, un programa multi-disciplinario y un programa di tres generacion y representando casi un di cuater generacion. Den nomber di Departamento di Cultura, Biblioteca Nacional y mi persona, ta mas cu un placer y honor pa haci esaki pa comparti”, Lacle a bisa.

E evento ta habri pa tur persona y ta completamente gratis. Sr. Lacle a enfatisa cu aunke e evento ta habri pa tur persona, e espacio ta limita, mirando cu e espacio den Biblioteca Nacional no ta mucho grandi, mas o menos 100 pa 120 persona lo por asisti e celebracion.

Un di e poetanan cu lo presenta durante e celebracion aki, Leticia Wever, tabata presente na e rueda di prensa, y a conta un poco di su storia y con el a cuminsa den e mundo di poesia. El a conta cu for di añanan 80 e ta pone su sentimentonan riba papel, pero semper e tabatin miedo pa sali dilanti cu nan. “Mi rumannan si a tende di nan y nan ta mi tras pa mi publica nan prome cu mi muri. Cumpliendo cu deseo di mi ruman muhe grandi cu ta pusha mi y mi a busca Mirto pa yuda mi y debi na esey mi a haya e drive pa toch sigui dilanti”, el a bisa.

Wever a sigui conta cu Lacle a conseh’e pa inscribi den e competencia Poeta di Patria. Wever tabatin hopi miedo y p’esey el a bisa cu e no a bin pa competi, pero cu el a bin pa comparti. Wever a bisa cu segun e por a scucha comentario di hendenan presente tabata cu algun di nan a lanta para klap man y fluit p’e, “y esey ta un push pa mi sigui dilanti aworaki”, el a expresa.

El a splica cu pa Poeta di Patria el a presenta un poesia cu el a skirbi na aña 2000 y tin parti di e poesia cu no ta cuadra mas; y pa motibo cu el a inscribi dos dia prome cu inscripcion a cera, e no a haya e tempo pa cambia e partinan cu no tabata cuadra mas.

Aworaki Wever a informa tambe cu e tin mas di 100 poesia cla y e tin un buki tambe na printer cu ta spera lo por keda cla pronto pa e por comparti su poesia cu otro hende.

Sra. Olivia Benschop-Erasmus, un artista local, lo presenta un proyecto di dje durante e celebracion di Dia Internacional di Poesia. Benschop-Erasmus a splica cu e tabatin e idea pa haci un exposicion di un proyecto cu el a traha riba dje un aña largo durante pandemia. “E pandemia a trece hopi cambio den nos manera di pensa y tambe hopi hende a mira e pandemia como algo hopi negativo, locual ta un parti berdad, pero tambe e tin su parti positivo y esey ta locual ami a purba saca afo”, el a bisa.

El a sigui conta cu e ta un hende cu gusta crea cu su mannan y el a haya inspiracion, un anochi pa mainta, pa traha un serie nobo di biyetenan di florin cu a wordo diseña na aña 2019 door di Nigel Matthew. El a expresa cu tabata su deseo pa purba, na un forma di fantasia, crea algo bunita di e trabao di Matthew, pero riba tela.

“Mi ta maestra di traha riba textil, esey ta locual mi a studia na Hulanda y esey ta locual mi a purba trece riba tela y tur e diseñonan na un manera di fantasia y color. E arte lo wordo desvela diaranson awo”, el a agrega.

El a splica tambe cu el a traha e biyetenan di 1.20 meter di largo y 60 cm di hancho ariba tela. “E ta hopi bunita pa mira con un biyete chikito bo por transforma den un forma asina grandi y ami mes ta haya hopi great cu mi por expresa mi mes riba tela, en bes di riba papel”, el subraya.

Por ultimo Lacle a extende invitacion na pueblo di Aruba pa asisti na e celebracion multi-disciplinario y apoya e artistanan local.