Presidente di Comision Celebracion Dianan Nacional (CCDN), Robert Maduro a bisa cu a pesar cu nan tin un tarea specifico cu ta contribui tanto riba Dia di Betico, 18 di Maart; Dia di Rey, yegada di Sinterklaas y tambe festival di Dande, no obstante esakinan no ta kita afo cu nan por sugeri iniciativanan pa duna contenido na e dianan di fiestanan aki.
E echo cu CCDN ta envolvi mayoria di departamento y instancianan cu ta traha cu gobierno of no gubernamental, e comision aki por duna algun asistencia na otro organisacionnan tambe. E ta haya cu e necesidad celebra Dia di Betico di un forma protocolario y cultural ta importante, pero tambe e posibilidad di duna mas contenido pa medio di un catedra na nivel di enseñansa pa honra e bida y obra di e estadista aki. “Mi ta kere cu na momento cu esey lo presenta, nos ta dispuesto pa duna nos aporte riba dje.”
Betico y hobennan
Sr. Maduro a recorda cu e celebracion di Dia di Betico ta tumando luga oficialmente for di 2 di april 1992, fecha cu e ley aki a wordo pasa oficialmente den Parlamento di Aruba. El a laga sa cu e enfasis riba e celebracion nacional e aña aki ta riba nos hobennan. “Betico semper tabata un persona cu tabata admira y ta gusta mucha. E tabata un maestro di scol.” Considerando e aspecto relaciona cu Betico y e hobennan, CCDA a traha un programa cultural varia poniendo enfasis riba nos hobennan, caminda e hobennan lo demostra nan talento riba e dia aki.
E fecha di nacemento di Betico Croes lo wordo honra riba diaranson awor. CCDN a prepara un programa intensivo caminda pa 5’or atardi nan ta cuminsa cu e programa protocolar riba Plasa Betico Croes . Despues di esey na alrededor di 6’or atardi nan lo cuminsa cu e manifestacion cultural cu lo tuma luga riba e mesun plasa cu musica di diferente artistanan local. Tin diferente expresion cultural e anochi ey. Sr. Maduro a laga sa cu semper nan programa ta cuminsa den oranan di atardi pa anochi, ya cu den oranan di mainta famia mes ta ocupa cu nan actonan y cu fundacion Betico Croes.
