Tur luna Stichting Rancho ta organisa e actividad popular Marshe Rancho. E luna aki Stichting Rancho a yama bon bini na Centro di Desaroyo di Hende Muhe (CEDEHM) y HIAS Aruba cu lo participa pa prome biaha den e actividad aki. Ginelly Quandt, coordinador di Stichting Rancho, hunto cu e representantenan di CEDEHM y HIAS a splica comunidad kico e actividad lo encera y e motibo di participacion di e dos organisacionnan aki.

Quandt a splica cu Marshe Rancho ta un mercado local pa comunidad caminda nan por bende nan productonan y ilustra kico nan mes ta traha na cas, sea ta un ofishi, sea ta un cuminda, un obra di arte, etc. Esaki ta tuma luga tur ultimo diahuebs di luna y awe diahuebs esaki lo tuma luga un biaha mas, pero e biaha Stichting Rancho a yama bon bini na dos partner nobo, CEDEHM y HIAS Aruba.

“Nan ta bay ta banda di nos pa haci e actividad y trece mas persona posibel den comunidad pa por bende nan producto y mustra kico nan habilidad ta den obra di arte etc. Mi ta sumamente contento como Stichting Rancho cu nos por a uni cabes pa asina nos por yega na un bunita proyecto y sigui cune tambe den futuro unda cu nos por ofrece un bunita actividad social y cultural den e bario di Rancho y duna oportunidad na tur persona den comunidad pa participa den e bunita proyecto aki”, Quandt a expresa.

Marshe Rancho a cuminsa aña pasa como un mercado sin musica, sin mucho ambiente, pero despues e organisadornan a ripara cu e hendenan falta ambiente den dje y a inclui musica cu banda di Sr. Carlos Bislip y otro musiconan local cu a participa den e actividad. Pa e evento e biaha aki un biaha mas lo tin entretenimento den man di un banda local yama The Originals cu lo ta tocando musica reggae.

Apart di entretenimento, mas cu claro cu lo tin benta di diferente articulo y por su puesto cuminda, un parti importante di actividad cultural. Pa varios luna caba, Quandt a indica, nan ta haya varios hende cu ta bende pastechi, kroket etc. y invitacion semper ta habri pa cualkier persona cu tin algun cuminda tradicional, cuminda cu sabor crioyo, pa participa den Marshe Rancho pasobra esey ta e motibo di organisa Marshe Rancho. “Como Fundacion Rancho nos ta para pa e cultura di bario di Rancho y Aruba en general”, el a agrega.

Jahaira Valdez, project coordinator na CEDEHM, a gradici Stichting Rancho pa habri porta pa e organisacion y permiti nan uni na e actividad Marshe Rancho. E motibo pakico CEDEHM ta uni Marshe Rancho, el a splica, ta cu dia 8 di maart, Dia Internacional di Hende Muhe, CEDEHM hunto cu otro organisacionnan, manera Centro di Bario Dakota y HIAS a organisa un tremendo feria cu a hiba e nomber ‘Creando y Inspirando’

Valdez a remarca cu ariba e dia ey tabatin mas cu 30 hende muhe cu trece y presenta nan productonan cu nan ta crea y riba e dia ey nan a inspira otro hendenan cu a bishita e mercado. Mirando e concepto di Marshe Rancho, CEDEHM ta mira un biaha mas e oportunidad di crea y brinda espacio na e hendenan muhe pa exhibi un biaha mas nan producto, nan creacion y nan inspiracionnan.

“CEDEHM ta para y ta kere tras di e desaroyo di hende muhe y p’esey ta mira esaki como un gran oportunidad atrobe y nos ta uni e Marshe Rancho”, el a subraya.

Representante di HIAS Aruba a splica cu HIAS a wordo acerca door di CEDEHM pa participa den e actividad aki y esaki lo ta nan prome biaha participando. Como organisacion nan tambe kier forma parti di un actividad no solamente bunita, pero uno di hopi importancia tambe. “Pakico, pasobra ta esencial pa aki na Aruba nos sa di nos cultura, nos historia y no tin niun caminda mas bunita pa esaki tuma luga cu Rancho”, el a bisa.

El a enfatisa cu como Stichting HIAS nan ta haya importante pa nan participantenan sinti acogida di e comunidad Arubiano pa nan sinti cu nan tambe ta forma parti di e comunidad, un di e pilarnan integracion.

El a sigui splica cu na momento cu nan a wordo acerca pa forma parti di Marshe Racho nan a acepta di biaha pasobra e ta un oportunidad na unda nan participantenan tambe por siña un poco mas di e cultura y historia di Aruba.

Tambe, el a agrega, cu pa HIAS forma parti di algo cu ya caba ta existi, algo cu ta floreciendo, algo cu tin su proposito y obhetivonan, a cuadra cu e obhetivonan di HIAS Aruba. “Un di nos pilarnan tambe ta colaboracion cu entidadnan tercero y den e caso aki nos a forma un colaboracion cu Stichitng Rancho y tambe alabes cu CEDEHM”.

Finalmente, el a subraya cu HIAS ta kere den keda aporta continuamente na cierto actividadnan cu ta bunita y cu ta cuadra den e programa di HIAS y Marshe Rancho ta un di nan. “Esaki ta bay ta nos prome biaha, pero mi ta sinti caba cu e ta bay ta uno exitoso y nos lo kier continua nos participacion pa e actividad aki di Stichting Rancho”, el a remarca.

Por ultimo, Quandt, coordinadora di Stichting Rancho, a gradici CEDEHM y HIAS Aruba pa uni cu Stichting Rancho y participa den e actividad di Marshe Rancho y e extende invitacion na pueblo completo pa bishita Marshe Rancho awe diahuebs 25 di augustus for di 4or di atardi pa 7or di anochi na Visstraat 1 y disfruta di e dushi ambiente.