Centro di Desaroyo di Hende Muhe (CEDEHM) a lansa e luna aki “Red Tent”, un grupo di apoyo di hende muhe pa hende muhe. Jeanine Tromp di CEDEHM ta splica un poco e concepto di Red Tent y con a yega na e idea pa e grupo di apoyo aki.
Red Tent ta un grupo di sosten pa hende muhe cu lo tuma luga tur luna. Tromp a splica cu internacionalmente tin hopi Red Tent rond mundo y den bista di esaki CEDEHM a bin cu e idea pa cuminsa cu un Red Tent aki na Aruba tambe.
E concepto di un Red Tent ta pa ta e un espacio caminda hende muhenan ta bin hunto, como un grupo di sosten, unda nan ta bay duna otro apoyo. E ta un caminda cu nan por sinta combersa ariba diferente topico, traha riba e parti di intercambia idea, bin cu arte entre otro y tur a base di hende muhe pa hende muhe.
Tromp a indica tambe cu cada luna e Red Tent lo tin diferente topico y esaki lo tuma luga te cu november di e aña aki. Algun topico cu lo por bin dilanti ta e parti di amor propio di hende muhe, e parti di ta mama, lo tin topiconan di salud mental, salud sexual, menopauze, soledad, administracion di placa y hopi otro topico cu lo bin cune. Cada topico lo tin un profesional cu lo guia e grupo di participante.
Manera Tromp a menciona caba Red Tent lo tuma luga tur luna, un biaha pa luna, di 7or pa 9or di anochi na sede di CEDEHM. E grupo di apoyo Red Tent lo ta completamente gratis y lo ta pa un grupo di ocho hende muhe. Cada luna, dependiendo di e topico y si e hende muhe ta interesa den dje, ocho participante por inscribi pa asisti e Red Tent di e luna ey. Inscripcion ta tuma luga via e pagina di Facebook oficial di CEDEHM.
Pa loke ta e cantidad di cuponan limita, Tromp a remarca cu e grupo ta chikito pasobra lo tin topiconan delicado caminda e participantenan lo expresa nan mes, con nan experiencia tabata of con nan ta anda cu un tematica ey specificamente. Lo tin tambe momentonan hopi profundo emocionalmente y no ta tur ora un persona ta confortabel pa expresa den un grupo di hende grandi. Tur Red Tent lo tin un cantidad di ocho participante y e profesional cu lo guia e grupo dependiendo di e topico.
Edad cu lo enfoca riba dje pa Red Tent ta di 25 aña bay ariba. Tromp a splica cu nan a scoge e edad aki specificamente pasobra ya tin otro fundacionnan , otro instancianan, cu ta traha pa hoben y nan no kier bay den e mesun grupo di edad jong ey. Pa e edadnan mas jong nan sa traha caba cu e diferente instancianan aki tambe.
Participacion den Red Tent ta completamente. “No tin cu contribui cu nada. Djis yega cu bo idea, cu bo creatividad pa comparti cu otro pasobra e ta echt e parti di hende muhe biniendo hunto cu otro pa comparti y crea. Crea pa nos empodera, pa nos haya miho conocemento con pa yuda bo mes y yuda otro”, Tromp a enfatisa.
E siman aki, a tuma luga e prome Red Tent cu a trata e topico “Abo como e ser hende muhe, kico, bo ta, ken bo ta ”. Pa e siguiente luna, juni, CEDEHM lo informa trempan kico lo ta e topico y e fecha cu e Red Tent lo tuma luga pa e luna ey.
