Awe 20 di november 2020 ta dia internacional di derecho di mucha, cual na Aruba ta wordo reconoci tambe como dia nacional di derechonan di mucha. Awe ta un ocasion special cu rond mundo ta conmemora, cu 31 aña pasa Nacionnan Uni a aproba un Convenio di Derecho di Mucha, cual ta un tratado internacional cu ta reconoce derechonan humano di tur mucha (persona menor di 18 aña).
E convenio Di Derecho di Mucha a establece e.o derechonan di bida, educacion, e derecho di por hunga, derecho na bida familiar, derecho di proteccion contra violencia, derecho di no wordo discrimina, derecho pa wordo scucha y derecho pa cada mucha por desaroya su mes y alcansa su maximo potencial di bida.
Den e cuadro aki Centro di Desaroyo di hende Muhe (CEDEHM), departamento resortando bou di Minister di Asuntonan Social y Labor, kier conscientisa henter pueblo di Aruba pa asina refleha ariba e fecha importante aki. E aña aki e crisis di COVID-19 a resulta, mundialmente,na un crisis pa cu e derechonan di mucha.
E pandemia di COVID-19 tabatin efectonan inmediato riba nos muchanan. E Comision di Derecho di Mucha di Nacionnan Uni, a expresa su preocupacion pa locual ta e situacion di muchanan rond mundo, particularmente den situacionnan vulnerabel debi na e efectonan di e pandemia di COVID-19.
Hopi mucha rond mundo, tambe na Aruba, a wordo gravemente afecta: fisicamente,emocionalmente y psicologicamente. E dia mundial y nacional aki ta ofrece nos un punto di salida pa refleha y haya inspiracion pa reconoce, garantisa,defende, promove y celebra e derechonan di nos muchanan a traves di dialogo y accion cu por crea un mundo miho pa nan. Nos tur na Aruba tin un papel importante pa cu e bienestar y desaroyo di nos muchanan. CEDEHM tambe tin su papel importante den esaki.
E tratado internacional di e Derechonan di Hende Muhe, hancra den e Convenio di CEDAW ta punto di salida di CEDEHM. E Convenio di CEDAW tin conexion directo cu e Convenio di Derecho di Mucha. Estudionan ta demostra cu un hende muhe cu wordo bon guia por brinda un miho apoyo, stabilidad y educacion na su yiunan, nos muchanan.
Tanto e Convenio di Derechonan di Mucha como CEDAW ta resalta cu ambos mayor ta responsabel pa e cuido di nan yiunan. Nos ta convenci cu pa e famia, como nucleo di e comunidad y e ambiente natural pa e desaroyo di e mucha, ta necesario e bienestar di tur su miembronan.
Pa e desaroyo completo y harmonioso di e mucha su personalidad, e mester crece den un ambiente di hogar, un ambiente di felicidad, amor y comprension den cual ambos mayor tin un rol crucial.
E mayornan mester por duna e proteccion y asistencia necesario pa asina carga nan responsabilidadnan dentro di e comunidad na un manera completo pa bienestar di nan yiunan, nos muchanan.
Den hogar, na scol y den comunidad ta necesario pa hende hombernan tambe duna nan aporte di sosten na e hende muhenan pa asina por crea un miho balansa den e responsabilidadnan e.o. di cuido, cual ta necesario pa e desaroyo y bienestar optimal di nos muchanan.
