ORANJESTAD – UNOCA ta pasando den un proceso di restructuracion interno y cambio riba e fondo cu nan ta maneha pa sostene e veld di cultura. Actualmente peticion nobo no por wordo entrega durante un temporada, ora cu e proceso di reorganisacion lo bin cla.
E situacion aki a haci cu CEDE Aruba ta hayando algun organisacion cu ta bati nan porta pa wak si nan por haya sosten. Director di CEDE Aruba, Sr. Daniel Tecklenborg a declara na Bon Dia Aruba cu na e momento aki CEDE Aruba ta mirando cu nos ta yegando fin di aña caba, y nan fondonan ta hopi limita.
Destinacion di fondo
Igualmente el a laga sa cu e fondonan cu CEDE Aruba tin accesonan na dje na Hulanda y internacionalmente, nan ta traha mas riba e area social, educativo y recreativo.
“Nan no ta fondo cultural cu lo por trece un solucion pa e organisacionnan aki”, el a bisa. A pesar cu tin organisacion di indole cultural cu ta acerca CEDE Aruba pa sosten, Sr. Tecklenborg ta realistico bisando cu nan no por absorba e falta di UNOCA den e momentonan aki. E ta mira e situacion aki dificil pa den un tempo cortico intermedia cu fondonan di afo pa cumpli cu e proposito aki.
Sr. Tecklenborg a splica cu e posibilidad di acceso na fondonan di afo ta rekeri un proceso largo di evaluacion di un proyecto. Kiermen si bo kier busca fondo di afo, bo mester entrega bo plan tres pa seis luna prome.
Apoyo
E restructuracion di UNOCA a wordo anuncia un poco laat, mientras hopi organisacion tabatin nan plannan caba, y dado momento nan a keda pega cu e realisacion di nan proyecto. Sr. Tecklenborg ta spera cu e proceso di reorganisacion di UNOCA por cana bon.CEDE Aruba a ofrece UNOCA apoyo den e proceso di restructuracion di nan fondo, ya cu nan ta un instancia cu tin experiencia den e procedura riba e tereno aki. Director di CEDE Aruba a bisa cu nan tin plania un reunion cu UNOCA pa wak si nan por sostene UNOCA den e proceso di cambio cu ta tumando luga aworaki.
