CEDE Aruba cu campaña pa recauda $1 miyon pa comunidad

Ayera tardi, Centro pa Desaroyo CEDE Aruba a ofrece un conferencia di prensa pa medionan local, pa duna di conoce e programa Happy to Give Back, un union entre tres organisacion cu CEDE cu e fin di duna back pa comunidad.

Daniel Tecklenborg, director di CEDE Aruba, hunto cu Fundacion Pa Nos Comunidad, Ban Uni Man Pa Cria Nos Muchanan y YMCA Aruba a splica cu esaki ta pa via di e sosten cu Aruba a haya di Hulanda cu nan a crea e programa Happy to Give Back.

Tecklenborg a comenta cu dia 9 di april nan a anuncia e campaña pa recauda fondo, pa yuda comunidad di Aruba cu alimentacion. Ademas te aworaki nan a yega na e cifra di 525.000 florin recauda den e campaña online. E meta ta pa sigui cu esaki ta fin di september di e aña aki, pa haya 1 miyon dollar. Di mesun manera, Tecklenborg a menciona cu na e momentonan aki nan a pasa 30% di loke nan mester.

E fondonan cu ta wordo recauda a traves di e website www.happytogiveback.com ta wordo parti di e siguiente manera: 75% lo bay pa Fundacion Pa Nos Comunidad cu ta asisti famianan den necesidad cu paketenan di cuminda y cu na e momentonan aki ta yudando por lo menos 3.100 famia den comunidad.

15% di e fondonan aki lo bay pa e Fundacion Ban Uni Man Pa Cria Nos Muchanan, encarga di asisti muchanan den scol cu un desayuno. Di esaki Tecklenborg a bisa cu nan ta premirando cu siguiente aña escolar ta bay tin necesidad pa mas asistencia pa e desayuno di e muchanan.

E 10% cu ta resta ta dirigi pa YMCA Aruba, cu desde mas di un luna ta cushinando 200 cuminda cayente pa dia cu lo beneficia hendenan cu no ta cushina of no tin e hermentnan pa haci’e na cas. Nan ta realisa esaki hunto cu Red Cross Aruba, encarga di e registracion di personanan.

Di e manera aki, el a expresa cu e ayudo ta bon parti, mirando cu ta yega na diferente grupo como famianan henter, hende den isolacion y muchanan cu mas mester di dje. Tambe ta organisacionnan cu tin varios aña di experiencia y cu lo yuda comunidad den e siguiente lunanan.

Nan ta considera como aspecto importante e proteccion y etica cu nan ta duna pa e personanan cu nan ta yuda. Pa e motibo aki nan ta di acuerdo pa no publica potretnan of videonan di e personanan y muchanan cu tin mas necesidad, cu e obhetivo di proteha nan privacidad.

Di mesun manera, Tecklenborg a trece dilanti cu e fondonan di e programa aki mester usa di un manera consciente, pa e motibo aki na final di e campaña, nan lo publica un relato financiero riba e website di e programa.

El a gradici comunidad henter cu a provee donacionnan y recursonan financiero na e diferente instancianan den e tres luna aki, pa asina haci posibel cu hopi hende haya ayudo y cu nan no mester a usa e fondonan completo. El a sigura cu e problema aki no ta bay di awe pa mañan, cu ta bay ta un periodo hopi largo na unda cada florin ta conta.

Andreina Dirksz di Fundacion Pa Nos Comunidad a reitera cu 3.100 famia a ricibi te cuatro biaha pakete di cuminda den e tres luna aki. Ta importante pa nan como FPNC, cu tur e donacion cu ta drenta wak con nan por haci pa larg’e lo mas hopi posibel.

Jonh Fun di fundacion Ban Uni Man Pa Cria Nos Muchanan a duna di conoce cu esaki ta un fundacion cu a wordo crea 19 aña pasa cu a cuminsa cu 138 mucha, e aña escolar aki di 2019-2020 nan tabata sirbiendo desayuno pa 650 mucha tur dia. Di loke ta trata e crisis di Covid-19, Fun a bisa cu esaki a cay completo.

Ademas, Fun a expresa cu na momento cu scolnan cuminsa pa otro aña, nan ta premira pa haya mas muchanan cu pa via di e crisis aki a laga hopi famia den necesidad. Na e momentonan aki e muchanan ta sigui hayando nan desayuno tur dia, pero door cu scolnan no ta trahando na 100%, nan no ta yega na e 650 mucha.

Chris Figaroa di YMCA Aruba a manifesta cu desde cu e crisis di Covid-19 a yega, nan a wordo acerca pa e proyecto, pa asina nan por yuda e comunidad na e momentonan aki. El a sigura cu tur dia, nan ta prepara cumindanan cayente pa yuda esunnan den mas necesidad.