Ayera mainta, CEDE Aruba tabata un di stakeholders cu a reuni cu formador minister demisionario Evelyn Wever-Croes na unda a afirma cu e reunion a bay den bon ambiente y cu e meta cu nan tabatin pa cu esaki e dia di ayera ta pa ripiti un biaha mas e logronan cu nan a bin haciendo den ultimo añanan.

Daniel Tecklenborg director di CEDE Aruba a splica cu nan tambe tin retonan como organisacion y como area social den tempo di pandemia aki na unda cu CEDE Aruba ta un organisacion cu ta financia y sostene proyectonan den comunidad specialmente iniciativanan cu ta bin for di e pueblo mes of organisacionnan cu no ta gobierno.

Nan ta haci esaki door di nan mes duna fondonan of intermedia y busca fondonan internacional cu Samewerkende Fondsen Cariben, cu ta nan partner mas grandi pero tambe otro organisacionnan internacional como Union Europeo pero tambe companianan local.

Durante e conferencia Tecklenborg a menciona cu nan ta contento di por anuncia y mustra cu den ultimo cuatro añanan, cada aña e financiamento di proyectonan a crece cu financiamento di CEDE mes of door di nan partners cu nan a logra atrae, vooral den pandemia cu iniciativanan manera Happy to Give Back pero tambe cu e fondonan di Union Europeo.

Den e reunion nan a enfoca riba resultadonan cu nan a logra pero tambe nan a papia riba e retonan na unda cu ainda nan ta kere cu claro door di pandemia, e principal pilar di economia di Aruba a sacudi hopi cu ta turismo, pero prome cu pandemia ya caba tabatin un desbalansa entre entrada di turismo pero tambe posicion di famianan na Aruba cu ta hopi bao presion, como famia ta responsabel pa lanta nan yiu y ta responsabel tambe pa cuida e hende grandi na unda cu e mercado laboral y e sistema manera con Aruba ta traha “no ta duna bo espacio pa bo funciona optimal como famia”, el a sigura.

Tambe el a trece dilanti cu hopi biaha e organisacionnan social y sector social tin cu carga e consecuencianan y tin cu soluciona e problemanan cu no ta cuminsa eynan, ta cuminsa den e desbalansa y nan a pidi specificamente pa pone atencion pa crea mas balans y haci e mercado laboral mas atractivo pa e hendenan local pero tambe pa sostene e famianan den esaki pa por cumpli cu su debernan mirando e retonan cu tin bao hubentud y tambe bao di adultonan mayor.

Un otro reto cu nan a trece dilanti ta e sistema di financia fundacionnan na Aruba cu pa hopi tempo manera Tecklenborg a destaca, e sistema aki mester wordo modernisa “nos ta kere den procesonan hopi mas facil, menos burocratico y tambe pa financiamento pa mas cu un aña, nos ta kere cu organisacionnan na Aruba mester tin e trankilidad di por haci nan trabao y no cada bes cu tin insiguridad riba financiamento” el a bisa.

Asina mes, el a destaca cu na Aruba hopi fundacion a tuma un tarea cu eigenlijk ta tarea di gobierno pero, e ora ey nan tin cu zorg pa nan por haci nan trabao optimal, “ y na e momentonan aki nos ta leu for di esaki, nos ta kere cu ultimo tempo a purba di mehora e sistema pero tin hopi caminda pa cana y nos tambe a sigura cu nos ta dispuesto como CEDE Aruba pa contribui na un desaroyo positivo di e sistema”, Tecklenborg a enfatisa.

Un otro aspecto cu el a trece dilanti ta e capacity building pa e fundacionnan, Aruba tin un cultura di boluntarismo, tin un cultura di organisacionnan cu ta contribui, pero asina mes el a sigura cu mester prepara e hendenan mas miho pa por ta cla pa un tarea asina, specialmente e generacion nobo na unda nan a pensa di ki forma nan por prepara e hendenan mas miho pa drenta den un bestuur, pa haci uso di tecnologia, pa maneha un organisacion, pa recauda fondo, pa maneha boluntario, entre otro. Ta un tipo di studio chikito cu tur hende mester haci cu kier drenta den un organisacion.

Nan tambe a presenta algun temanan cu nan kier mira den e siguiente añanan pa haya mas atencion y nan a papia entre otro riba un maneho nobo pa centro di barionan, cu lo ta mas positivo pa nan, ademas nan a papia over saneamento di debe den casnan priva di e famianan mirando e problemanan financiero cu tin aworaki y tambe riba educacion financiero, un sistema pa yuda famianan cu e cuido di hende grandi na cas, pa asina adapta casnan na e situacion y trece e servicio di cas.

Tecklenbrog tambe a afirma cu nan a papia over riba demencia y su aumento na Aruba hunto cu e necesidad di e famianan pa atende cune, e necesidad cu hobennan por tin un luga sigur despues di scol y asina tin mas apoyo mirando cu mayornan tin cu traha na dos of tres trabao y esey ta un reto pa hobennan por tin un luga pa nan por wordo stimula positivamente.